Accessibility links

Кайнар хәбәр

Ğiraqta yaña xakimiatkä xezmätkä alınğan 49 keşe üterelde


Ğiraqtağı radikal'' ğisyançılar çit il keşelären urlaw häm üterü belän genä çiklänmi, andağı waqıtlı xakimiat häm amerikannar belän xezmättäşlek itkän ğiraqlılarğa qarşı da höcümnär yasıy. Şulay itep alar Ğiraqnıñ Quşma Ştatlar yaqlawı belän qorılğan waqıtlı xakimiatenä ışanıçnı yuq itärgä tırışa. Uzğan atna azağında ğisyançılar Ğiraqnıñ Milli Guardiäsendä xezmät itkän, xärbi mäktäptän tuğannarın kürergä dip qaytqan 49 ğäskärine üterde.

Ğiraq xärbilären üterü yaxşı häm centekläp oyıştırlğan ğäskäri operatsiägä oşap tora, xörmätle tıñlawçılar. Şuşı waqiğä Ğiraqnıñ könyağında, Badra Qazaniä tirälärendä bulğan dip xäbär itelä. Milli Guardiä xezmätkärläre Baquba şähärendä urnaşqan künegülär üzägennän öç minibusqa utırıp ilneñ könyağına, tuğan yaqlarına qayta torğan bulğan. İran çige yanındağı çuldän ütkändä alarnı politsiä kiemendäge ğisyançılar tuqtatqan. Şul urınğa berniçä säğät ütü belän kilep citkän ber Ğiraq xärbie, Jässim äl-Saadi, anda kürgännären bolay sürätli:

Audio, Jässim äl-Saadi

"Badra Qazaniä yanındağı wäxşät turında bezgä kiçke 10-da xäbär itelde, politsiä häm Milli Guardiäneñ urtaq kizüe şunda uq höcüm urınına yul tottı, bez ber säğättän anda idek. Üterelgännär unikeşärläp başlarına atılğan xäldä yata ide" di yaqındağı Mandali şähärndäge Ğiraq xärbie Yässim äl-Saadi. Tän yaraları şunı kürsätä - Milli Guardiä xezmätkärläreneñ ber öleşe cäzalaw räweşendä atıp üterelgän, unnan artığı qaçarğa tırışqanda yuq itelgän. Şuşı höcüm öçen cawaplılıqnı mäğlüm radikal Äbu Musab äl-Zärqawi alğan. Ul citäklägän törkem ber islam säxifäsendä, möcähidlär alarnıñ barısın da üterde, ike maşinasın yawlap aldı häm alarğa xucaları tülägän aqçanı da üz qulına töşerde dip belderä. Belgeçlär fikerençä, Ğiraqnıñ xärbi ostalıqnı äle yaña ğına öyränep kilgän ğäskäriläre radikal'' ğisyançılar öçen bik qulay xädäf bulıp tora. Yaxşı qorallanğan Könbatış ğäskärlärenä töşe citmäw säbäple alar xäzer waqıtlı xökümät belän xezmättäşlek itkän ğiraqlılarğa höcüm itä.

Audio, Phillip Mitchell

Londondağı Strategik tikşerenülär institutı xezmätkäre Phillip Mitchel süzlärençä, ğisyançılar Ğiraq köçlären ciñelräk xädäf itep kürä. Alarnıñ şul cirle köçlär turında mäğlümat cıyu mömkinlekläre dä kiñräk dip belderä Mitchel. Quşma Ştatlarnıñ "Wall Street Journal" basması yazuına qarağanda, şundıy höcümnärdä Ğiraqnıñ yaña iminlek köçlärennän inde meñ yarımnan artıq keşe hälak bulğan. Amerikan ğäskäriläre arasında bu san 1100 tiräsendä, moña äle suğışlardan ğäyre hälak bulğannar da kerä. Belgeçlär, ğisyançılarnıñ Ğiraq iminlek köçlärenä höcümnären arttıruı barı tik alarnıñ tübän däräcäle äzerlege belän genä añlatılmıy, biredä başqa maqsat ta bula ala dip isäpli. Misal öçen, alar ğadi ğiraqlılarğa, amerikannar yaqlağan xakimiatneñ köçsez buluın, anıñ üzen dä yaqlıy almawın kürsätergä tırışa ala. Andıy fikerne ütkärü kiläse ğinwarğa bilgelängän saylawlar aldınnan yaña Ğiraq xökümäte öçen bigräk tä qurqınıç bula ala. Elek amerikan küzläw oyışmaları, Ğiraqta 2 meñnän alıp 7 meñgä qädär ğisyançı bula ala dip belderep kilä ide, xäzer isä Quşma Ştatlarnıñ räsmi wäkilläre bu sannıñ tağın da yuğarı bula aluı, yaña xakimiatkä häm Könbatış köçlärenä qarşı 8 meñnän alıp 12 meñläp suğışçınıñ köräşü ixtimalı turında söyli.

Kärim Kamal
XS
SM
MD
LG