Accessibility links

якшәмбе, 11 декабрь 2016, Казан вакыты 03:24

Gäzitlärneñ tögäl tirajın belep bulaçaq


Bilgele bulğança, törle säbäplär arqasında bügenge köndä Rossiädä küp kenä gäzitlär tirajların arttırıp yäki kimetep kürsätä. Milli tiraj xezmäte isä barlıq basmalarnıñ tögäl tirajı ütä-kürenmäle bulırğa, yäğni böten keşegä açıq kürenergä tieş dip sanıy. Häm bar şul oçraqta ğına gäzitlärneñ eşçänlege alğa kitäçäk, çönki alarğa reklama birüçelär aldanudan qurıqmıyça reklama biräçäk dip bilgeläp uza. İke yıl elek tiraj xezmäteneñ Seber, Ural wäkillekläre oyışqan bulğan. Bügen isä anıñ İdel buyı wäkillegeneñ burıçları bilgelände.

Äytergä kiräk, İdel buyı wäkillege yaña ğına açılsa da, älege xezmät Mäskäwdä barlıqqa kilgäç ük añarğa inde Qazannan qayber basmalar kergän. Alar barlığı bişäw – “Вечерняя Казань “, “Вабанк-Казань”, “Я покупаю”, “ “Имидж” katalogı häm “Телесемь'” gäzitläre. Äytergä kiräk, bu tirajları zur bulğan basmalar.

Milli tiraj xezmätenä kerü gäzitlär öçen tüläwle – bäyä tirajğa qarap. Mäsälän, “Комсомольская правда” gäzite kvartalğa ber meñ yarım dollar tüli ikän. Ä Qazanda çığuçı “Вечерняя Казань” 150 dollar.

“Gäzitlärneñ tögäl tirajların xalıqqa kürsätü basmalarğa berençe çiratta reklama kiteräçäk” – dide matbuğat oçraşuında Milli tiraj xezmäteneñ citäkçese İgor Yakovenko. Häm tiraj xezmäteneñ maqsatı da gäcitlärgä reklama birderü öçen eşlängänen añlarğa bula.

Mäsälän, “Вечерняя Казань”ğa reklamanı xätta çit ildän dä birälär ikän. Milli tiraj xezmäte isä Tirajlarnı kontroldä totu byurosınıñ Xalıqara federatsiäsenä dä kergän. Häm älege xezmätkä kergän yäğni sertifikatsiä uzğan barlıq basmalarnıñ mäğlümatları Xalıqara federatsiägä, törle reklama birüçe agentlıklarğa tarala.

Gazetalarda reklama bulmaw bügenge köndä jurnalistlarnı däwlätkä bäyle bulırğa mäcbür itä. Şul nisbättän küp jurnalistlar aqça eşläw öçen ayırım aqça tüläwçelärgä yallanıp yaza. “Rossiä gäzitlärendä bügenge köndä jurnalistika bötenläy yuq, anda barısı da şul zakazğa yazılğan mäqälälärdän tora. Bu barısı da reklam bulmağanğa bäyle”, - di İgor Yakovenko.

İdel buyı tiraj xezmäte wäkillegeneñ citäkçese Artem Tyrin “Tatarstanda berkem dä älege xezmätkä köçläp kertelmäyäçäk. Respublika, şähär, rayon gäzitläre xezmätneñ ni däräcädä möhim ikänen añlap üzläre kiler dip ömetlänäbez”, - dide. Mäsälän, Çiläbedä barlıq gäzitlär dä sertifikatsiä uzğan ikän. Şuña anda reklama törle yaqlardan kilä di.

Tatarstan gäzitläre Milli tiraj xezmätenä kererme? Anısın äle äytüe qıyın. Ämma telägän här keşe telägän gäziteneñ tirajın belä alaçağı härkemgä dä mäğlüm.

Landış Xarrasova

XS
SM
MD
LG