Accessibility links

дүшәмбе, 5 декабрь 2016, Казан вакыты 05:39

BMOnıñ terrorğa qarşı baş räsmie dönyanıñ terrorğa qarşı köräşe belän qänäğät tügel


Berläşkän Millätlär Oyışması dönyanıñ töp afätenä, terrorğa qarşı citärlek çaralar kürelmäwenä borçılu belderä. Oyışmanıñ terrorğa qarşı baş räsmie Javier Ruperez şuşı könnärdä Venada bulıp, terror ğämällären kisätü, terrorçılarğa yärdäm yulların özü öçen bar illärneñ küzläw häm politsiä köçlären nığraq xezmättäşlek itergä çaqırdı.

2001neñ 11 sintäber xöcümnärennän soñ Berläşkän Millätlärneñ İminlek Şurası, xökümätlärdän, terrorçılarğa finans häm başqa törle yärdämne tuqtatu öçen tieşle çaralar kürergä, qanunnarğa üzgäreşlär kertergä taläp itkän ide. Şuşı qararnıñ mömkin qädär kübräk ildä ütälüen täemin iter öçen bıyıl BMOnıñ terrorğa qarşı komietetı qarşında başqarma idarä tözelde. Uzğan atna bu idaräneñ başlığı Javier Ruperez Venağa kilep anda urnaşqan oyışmalar belän komitetnıñ eşen canlandıru turında söyläşülär alıp bardı. Yevropada İminlek häm Xezmättäşlek oyışmasında çığış yasap, Ruperez, terrorçılıqnı tuqtatu öçen iñ qulay yul – anı buıp üterü dide, yağni künegü urınnarın, finans çığanaqların yuq itü. "Xalıqara terrorçılıq märxämätsez suğışqa äzerlänä, dönya moña qarşı torırğa tieş",- dip kisätte ul. Terroğa qarşı berdäm front tözü eşeneñ bik sülpän baruına Ruperez ükeneç belderde. "Küp kenä illär üz qanunnarına äle dä tieşle üzgäreşlär kertmäde. Monı eşlär öçen terror ğämälen kötep torası yuq, bu üzgäreşlär xöcümnärne kisätä ala",- di Javier Ruperez:

Audio (Javier Ruperez): "Terrorçılıqqa qarşı köräş, nigezdä kisätü köräşe bulırğa tieş. Yağni, qanunnarnı köçäytü, tieşle qanuni çaralar kürü, äytik, politsiä belän küzläwneñ xezmättäşlege turında, axır çiktä bu terrorçılarnı tuqtatu öçen kiräk bulğan mäglümät bulıp tora."

Berläşkän Millätlär mäglümätenä qarağanda dönyada barlığı 80nän artıq terrorçıl oyışma bar, şul isäptän Äl Qaidä häm anıñ bülekçäläre. Şuşı yılnıñ Mayına qädär İspaniäneñ Quşma Ştatlardağı ilçese bulıp eşlägän Rupereznıñ terrorçılar belän üz xisabı bar. 1979 yılda ul qısqa waqıtqa Bask separatisları tarafınnan urlanğan ide. Ruperez süzlärençä, Yevropada İminlek häm Xezmättäşlek oyışması terrorğa qarşı köräşneñ alğı safında tora. Oyışmanıñ terrorğa qarşı bülege qılğan soñğı ğämällärneñ berse – çik buylarında, su, timer yul, yök maşinası belän taşılğan yöklärne tikşerüdä xezmättäşlekne köçäytü. BMO mäglümätenä qarağanda dönyadağı bar yöklärneñ 90%tı şuşı yul belän zur konteinerlarda taşıla. Bu yöklär çik buyında tieşle däräcädä tikşerelmi. Ğärçä anda narkotik, qoraldan alıp, qanunsız möxäcirlärgä qädär, teläsä närsä bula ala. Bolar isä Ruperez fikerençä, terrorçılarnıñ matdi çığanaqları bulıp tora:

Audio (Javier Ruperez): "Narkotik, keşe satu, aqça yuu, korrupsiä – bolarğa qarşı köräş berük waqıtta terrorğa qarşı köräş bulıp tora."

Ruperez süzlärençä, terrorğa qarşı bar ısullar belän köräşergä kiräk. "Terrorçılar berqayçan da bireşmäyäçäk. Häm bez dä berqayçan da bireşmäyäçäkbez",- di, Berläşkän Millätlärneñ terrorğa qarşı komitetı qarşındağı başqarma idarä başlığı Javier Ruperez.

-Ali Gilmi
XS
SM
MD
LG