Accessibility links

дүшәмбе, 5 декабрь 2016, Казан вакыты 21:44

Räsmi Mäskäw turıdan-turı Ukraina saylawlarında üzeneñ Viktor Yanukoviçne yaqlawın kürsätä


Sişämbedä Rusiä prezidentı Vladimir Putin öç könlek säfär belän Ukrainağa kilde. Räsmi töstä anıñ şuşı säfäre Ukrainanı natsi basıp aluınnan azat itüneñ 60 yıllığı uñayınnan yasala, läkin moñardan tış Putinneñ Ukrainağa kilüe artında başqa mänfäğätlär dä tora digän fiker bar. Rusiä prezidentınıñ şuşı säfäre kürşe häm Mäskäw öçen möhim Ukrainada prezident saylawlarına berniçä kön qalğanda yasala.

Ukraina başqalası Kievtä yäşäwçelär natsilardan azat itü könen ğädättä 6-nçı noyäbrdä bilgeli. Ä menä bıyıl monı üzgärtergä, tantanalarnı aldanraq ütkärergä buldılar. Bu tantanalarnıñ tağın ber üzençälege - alarda Rusiä prezidentı Vladimir Putin dä qatnaşa, şul maqsatta ul öç könlek säfär belän sişämbedä Kievkä kilde. Ämma Ukrainada, Rusiä citäkçeseneñ şuşı säfäre häm bıyılğı tantanalarnı küçerü artında ike ilneñ xakimiate açıqtan-açıq belderelmägän başqa säbäplär yatmıy mikän digän soraw yöri. Eş şunda ki, bu yäkşämbedä ildä prezident saylawları ütkärelä häm anda xäzerge ukrain prezidentı Leonid Kuçma wä Mäskäw yaqlağan premyer-ministr Viktor Yanukoviç häm oppozitsiäneñ töp wäkile Viktor Yuçenko arasında ciñü öçen ayawsız köräş bara. Yanukoviç mömkinlek çıqqan sayın üzeneñ Rusiä belän tığız bäyläneşlärdä qalırğa teläwen beldersä, Yuçenko Ukrainanı Könbatış, ayırım alğanda NATO, Yevropa Berlege häm Quşma Ştatlar belän xezmättäşlekkä boru kiräklegenä basım yasıy. Rusiä citäkçelege, şul isäptän Putin üze dä premyer Yanukoviçne yaqlawın yäşermi. Rusiädä yäşäwçe ukrainnar arasında inde küptännän Yanukoviçne yaqlaw kampaniäse alıp barıla. Şuña kürä dä Vladimir Putinneñ Kievkä näq menä prezident saylawları aldınnan kilüe zur simvolik ähämiatkä iä. Sişämbe kiçen ul beryulı öç telekanal aşa tapşırılaçaq canlı aralaşuda qatnaşa. Şulay itep Rusiä citäkçesenä Ukraina saylawçıları belän turıdan-turı aralaşu häm üz fikeren citkerü mömkinlege birelä. Kievtä çığa torğan "Säyäsi Fiker" basması möxärrire Volodimir Polohalo, Vladimir Putinneñ säfäre häm monıñ nindi waqıtqa turı kiterelüe xaqında bolay di:

Audio, Volodimir Polohalo

"Biredä bilgele ber simvolizm turında süz yörtergä bula, Viktor Yanukoviç inde äytte, ägär dä saylana ikän, ul ber yünäleştä eş itäçäk prezident bulaçaq. Yanukoviç Ukrainanı NATO häm Yevropa Berlegenä taba yıraq kiläçäktä genä alıp barıp bula, bügen isä östenlek Rusiä belän mönäsäbätlärgä, anıñ belän urtaq iqtisadi kiñlek qoruğa birelergä tieş dip belderä. Şunıñ sürätendä, Yanukoviçneñ elegräk Mäskäwdä, Ukrainada häm Qırımda Putin belän uzğan oçraşuları sürätendä, Putinneñ Kievkä xäzer kilüe anıñ turıdan-turı Viktor Yanukoviçne yaqlawın kürsätä" dip isäpli Volodimir Polohalo. Anıñ fikerençä, Putinneñ şulay itep ber tarafnı aluı, Ukrainanıñ könyağında häm könçığışında yäşägän urıs-telle xalıq arasındağı älegä tawışların kemgä birüne xäl itmägän 7-8 protsentlap saylawçığa tieşle yoğıntı yasıy ala.

Audio, Volodimir Polohalo

Polohalo, bu san Yanukoviç öçen bik urınlı bula ala dip isäpli, çönki älegä ike töp nämzät arasında köräş yaqınça bertigez yaqlaw belän bara. Mäskäwneñ Yanukoviçne yaqlawı säbäpläre arasında Polohalo tağın menä mondıyın da kürä.

Audio, Volodimir Polohalo

"Rusiädä qorılıp kilgän xakimiat avtoritar ber xakimiat, häm Putin üzeneñ şul qırıs idaräsen Ukrainada da şundıy uq xakimiat qorıp nığıtırğa ömetlänä. Başqa kürşelärdäge - Qazağstandağı xakimiat anı qänäğätländerä, Belarus''täge säyäsi idarä şulay uq. Ämma Putindä Yuçenko ciñgän oçraqta Ukrainada demokratik üzgäreşlär başlana ala digän qurqu bar, häm ul, üze avtoritar xakimiat citäkçese bularaq Ukrainada da näq şundıy uq idarä buldırırğa teli" di Kievtä çığa torğan "Säyäsi Fiker" basması mäxärrire Volodimir Polohalo. İke Viktornıñ - Yanukoviç häm Yuçenkonıñ Ukraina prezidentı bulu yarışına Rusiädän kilgän Vladimir Putin nindi tä''sir yasar, monı inde yäkşämbe saylawları ğına kürsätäçäk.

Kärim Kamal
XS
SM
MD
LG