Accessibility links

шимбә, 3 декабрь 2016, Казан вакыты 20:35

Tatarstanda 57 deputat Putin täqdimnären xuplıy,19 - qarşı çığa


Säyäsät belän qızıqsınuçılarnıñ iğtibarın futbol, xokkey yäki başqa uyınnıñ isäbe tügel, ä Däwlät Şurasındağı tawış birü näticäläre kübräk qızıqsındırdı. Belgänegezçä, 25 üktäberdä, parlament töbäk citäkçelären östän bilgeläw turındağı qanun tikşerelde. Säysi firqälär isemlekläre belän ütkärelgän saylawlar üz näticälären birä başladı, dip äytep bula. «Berdäm Rusiä» fraksiäse Putin täqdimnären xuplap çıqtı, «Tatarstan - yaña ğasır» xäräkäte fraksiäse qarşı tawış birde, kommunistlar xuplamadı, «Xalıq partiä»se tarafdarı yaqlaw belderde, bäysez deputatlarnıñ qaysıları xupladı, qaysılar yuq. Näticädä 57 deputat xuplaw beldersä, 19 qarşı çıqsa, 3-se bitaraf qalğan.

Gäzitlär 26 üktäberdä, baş mäqälälären parlamenttağı yalqınlı çığışlarğa bağışladı. Tatar gäzitläre parlament utırışında äytelgän süzlärne, çığış yasağan keşelärneñ isemnären bäynä-bäynä yazıp çıqtı. Urıs telle gäzitlär, tawış birügä dä, qanun belän kerteläçäk yaña tärtiplärgä dä, üz añlatmaların birde. Mäsälän ber bäysez oppozitsion gäzit, Tatarstan qarşı çıqmadı, ämma xuplaw da beldermäde, dip yazıp çıqtı. İkençe basma xäbärçese, Tatarstan, ägär mondıy xalättä teşlären kürsätmäsä, Tatarstan bulmas ide digän, fikerläre belän urtaqlaştı.

Öçençe ber gäzit, qayber deputatlarnıñ bu mäs’äläne inde aldağı däwlät şurası sessiäsendä tikşerergä cıyınuın iskä töşede. «Ämma, ul waqıtta, başta komitet üz süzen äytsen, dip alarnı tıñlarğa telämädelär», dip yazdı ul gäzit. İnde qanun xuplanğaç, täqdim iteläse tözätmälär dä açıqlandı. Berençedän, deputatlar, parlamentnı taratu turındağı matdäne federal qanunnan alıp taşlarğa täqdim itä. İkençedän, Rusiä Prezidentı häm ul bilgelän region citäkçese arasında ber nindi aradaşçılar bulmasqa tieş dip sanıy alar. Öçençedän, Tatarstan deputatları, älege qanun, Vladimir Putinnıñ xakimlek itü mötdäte betkängä qädär genä ğämäldä bulırğa tieş, digän matdäne kertergä täqdim itä.

Bikä Timerova.

XS
SM
MD
LG