Accessibility links

җомга, 9 декабрь 2016, Казан вакыты 14:36

Udmurtiä başqalası İjawda bıyıl iftar aşları mäçettä genä uza


Udmurtiä respublikasınıñ başqalası İjaw şähäreneñ tatarlar tuplanıp yäşägän törle rayonnarında ütkän yıllarda ramazan ayında iftar aşları oyıştırıluı xaqında kön sayın diärlek xäbärlär kilep tordı. Bıyıl din totuçılar qoyaş batqaç awız açarğa İjaw cämiğ mäçetenä genä aşığa. Anda aştan soñ tärräwix namazın da uqi, din qärdäşläre belän aralaşa da. Bıyıl başqa töbäklärdä awız açtıru mäclesläre oyıştırılmawınıñ säbäbe xaqında möselmannar üzläre ük — saylawlar çorı uzdı, deputat mandatına iä buluçılar ber-ike yıl tınıç qına utıraçaq, ä inde deputat bulırğa niätläre buluçılar şulay uq xalıq arasına soñraq çığa başlar dip äyttelär. İkençe tapqır Udmurtiä Däwlät Sovetı deputatı mandatına iä bulğan Fäniä xanım Fedorova üzeneñ okrugında yäşägän häm yärdämgä moxtac bulğan möselmannarğa ramazan ayında rizıqlar alıp öläşergä qarar qılğan. Başqa tatar deputatlarınnan xäbärlär işetelmäde. İnde mäçettä oyıştırılğan iftar aşlarına kilgändä. Bıyıl da bu mäcleslärne äzerläwdä mäçet ber tien dä aqça totmıy, din qärdäşlärebez monıñ öçen yäisä aqçalata, yäisä aşamlıqlar alıp kiterä dip söyläde mäcleslärne oyıştıruçı Gölsem xanım. Bıyıl iftar aşların äzerläwçelärne saylap alu öçen mäçetkä din nigezlären öyränergä yörüçelär arasında konkurs uzdırğannar. Xatın—qızlar arasında osta peşerüçelär bik küp ikän, alarnıñ qayberäwläre elek aşxanälärdä eşlägän, annan meditsina—sanitariä taläplären dä ütärgä kiräk, kön sayın aşlarnı da tikşerep toralar dip söylädelär aşlarnı uzdıruçılar. Oyıştıruçılar süzlärenä qarağanda, awız açarğa mäcleskä kön sayın 200 dän artıq keşe yöri, yal könnärendä keşe kübräk tä bula ikän. Berniçä keşe äñgämädä älege aşlarğa qarata üzläreneñ fikerlären belderde. (audio) Nuriä xanım mäçetkä inde ölkän yäştä genä yöri başlasa, yäşlär arasınnan Rozaliä durt yäşennän dini belem ala başlağan. (audio) İjawğa Çallıdan kilgän xanım biredäge mönäsäbätlär xaqında mondıy fikerdä (audio) İnde apalar belän sawbullaşıp mäçettän kitärgä cıyınğanda, tağın berniçä keşe ramazan ayında bezdä biredä berläşep awız açtırırğa niätlibez, kilegez dip qaldılar. Ä mäçet işek aldında unlap malaylar mäclestän soñ hawa sularğa çıqqannar, tärräwix namazına qädär waqıt bar äle dip, tup tabıp uyın da oyıştırğannar. Şulay itep, mäçetkä yörüçelär utırıp sabaq ta uqıy, waqıtı citkäç, tämle rizıqlar belän awız aça, namaz uqıy, wäğäz tıñlıy, balalar uynap ta ala.

Xämidä Ğayfullina, Udmurtiä

XS
SM
MD
LG