Accessibility links

Кайнар хәбәр

İzrail: Şaron xökümätendäge 4 ministr premyerğa ultimatum quya


İzrail premyer-ministrı Ariel Şaron Gazadan yähüdlärne kire İzrailgä qaytaru, ul töbäkne tulısınça fälästinlelärgä qaldıru planın parlament aşa ütkärä alsa da, anıñ köndäşläre birelergä cıyınmıy. Şaronnıñ üz xökümätenä kergän berniçä ministr Gazadan kitü planın referendumğa çığarunı taläp itä, premyer-ministr isä monı kire qağa.

Fälästin cire sanalğan, läkin 1967-nçe yılda İzrail tarafınnan yawlap alınğan Gaza sızığında bügenge köndä 8100-läp yähüd yäşi häm alarnı anda äle İzrailneñ meñlägän ğäskärie saqlap tora. Premyer-ministr Ariel Şaronnıñ Gazadan kitü planı, bar 21 utardan da waz kiçep İzrailneñ annan tulısınça, yäğni anda yäşäwçe yähüdlärneñ dä, xärbilärneñ dä kitüen küz aldında tota häm sişämbe könne ul qızu bäxäslärdän soñ parlament tarafınnan da raslandı. Şaron moña barı tik oppozitsiädä torğan sulçılarnıñ yardäme belän genä ireşte, çönki ul citäklägän Likud partiäse deputatlarınıñ yartısı Gazadan kitü planına qarşı ide. Şuşı qarşılıq parlamenttağı ciñü belän tämamlanmadı, kiresençä, İzraildäge ictimaği-säyäsi wäzğiat xäzer yaña ber kierenke çorğa kerep bara. Premyer Ariel Şaron xökümätendäge 4 Likud ministrı tawış birüdän soñ, ägär dä şuşı plan ike atna eçendä referendumğa çığarılmasa, bez xäzerge urınnarıbızdan kitäçäkbez dip belderde. Alar arasında İzrailneñ elekke premyer-ministrı Benyamin Netanyahu da bar häm taläplärne näq menä ul bäyän itte.

Audio, Benyamin Netanyahu

"Bez, berniçä ministr häm knesset deputatı, premyer-ministrğa mäs''äläne referendumğa çığaru öçen ike atna waqıt birergä telibez. Ägär dä bu qabul itelmäsä, bez xökümättä eşläwebezne däwam itä almayaçaqbız" dip kisätä Benyamin Netanyahu. Ariel Şaron inde bolay da, planğa qarşı tawış birgäne öçen sişämbe kiçen ber ministrnı eşennän azat itkän ide. Dürt ministr taläbenä dä ul birelmäyäçägen belderä. Ariel Şaron, "ğäskäri general bularaq min bernindi dä ultimatumnarğa birelmädem häm birelmäyäçäkmen" digän süzlär äytte. Şaronnıñ şul referendum taläbenä qaraşın anıñ matbuğat wäkile Raanan Gissin bäyän itte.

Audio, Raanan Gissin

"Ul, yäğni premyer-ministr inde açıq itep äytte, bernindi dä referendum bulmayaçaq, çın referendum kiçä kiç, yäğni sişämbe kiçen ütte, xalıq üz tawışın birde" di Şaronneñ matbuğat wäkile Gissin. İzrailneñ Gazadan kitü planı älegä nigezdä qabul itelde, anıñ ayırım öleşläre dä kiläçäktä tawışqa çığarılaçaq. Tulısınça ğämälgä quyılğan oçraqta anda yäşäwçelärne İzrailgä küçerü kiläse cäydä başlanırğa tieş bulaçaq. Yortlar häm sinagoglar cimereläçäk, qalğan xucalıq fälästinlelärgä tügel, ä öçençe ber tarafqa tapşırılaçaq. Ğäskärlärne çığaru isä kiläse yılnıñ azağına tämamlanaçaq dip farazlana, läkin çikne, diñgez yarların häm hawa kiñlegen saqlaw İzrail qaramağında qalaçaq. Gazadan küçep kitüçelärgä 100 meñnän alıp yartı million dollarğa qädär qaplaw qaralğan. Läkin centekläp äzerlängän şuşı çaralarğa qaramastan İzrail cämğiateneñ uñçı, millätçel öleşe Ariel Şaronnıñ Gazadan kitü planına kisken qarşı çığa häm moña qayber Likud ministrlarınıñ da quşıluı, bigräk tä alar arasında Netanyahunıñ buluı, İzraildä Şaronğa qarşı yaña säyäsi köçneñ barlıqqa kilüenä yardäm itä ala.

Kärim Kamal
XS
SM
MD
LG