Accessibility links

җомга, 2 декабрь 2016, Казан вакыты 20:59

Qazanda yullar tözekländerelä


Qazan üzägendä yullarnı tözekländerü, Gor’kiy parkı yanında yaña yul tözü säbäple şähärdä maşinalarda yörü könnän-kön qıyınlaşa, uramnarda ozın-ozın bökelär xäzer inde qazanlılar öçen ğädäti küreneşkä äylänep bara. Şulay itep, yış qına qazanlılar äçen bügenge könnärneñ iñ möhim yañalığı bulıp soñğı aralarda qayda yul bökese, qaysı cirdä yul yabıq yäki açıq bulu turındağı mäğlümät tora. Xäyer, qızıqsınuçılar öçen tatarstanda başqa yañalıqlar da bar.

Respublikanıñ citäkçelegeneñ kübese bu könnärdä Tatarstanda tügel. Prezident Mintimer Şäymiev häm anıñ belän ber törkem xökümät wäkilläre, inde xäbär itkänebezçä, Qazaqstanğa kitte. Däwlät Şurası räise Färit Möxämmätşin isä 26-27 oktäberdä Mäskäwdä buldı. Ä menä respublikanıñ Awıl xucalığı ministrı Marat Äxmätov älegä yalda. Ul qaytqaç, tatarstanlılarnı ber küñelsez xäbär kötä. Respublikanıñ agrosänäğät üzäge citäkçese urınbasarı Aleksey Manonin süzlärenä qarağanda, ministr belän kileşelgännän soñ onğa bäyälär artaçaq. Bu üz çiratında ikmäk häm qamır azığına bäyälärneñ üsüenä kiteräçäk. Respublikanıñ Eçke eşlär ministrlığı xezmätkärläre tarafınnan çärşämbe könne uzdırılğan matbuğat oçraşuında yañğırağan mäğlümätlär dä qazanlılarnı quandırmadı. Xoquq saqlaw oyışmaları wäkilläre kitergän sannarğa qarağanda, Tatarstanda keşelärne talaw oçraqları artqan. 2004 yılnıñ 9 ayında ğına da 2411 talaw oçrağı terkälgän. Cinayätçelär bigräk tä käräzle telefonnar, olı keşelärneñ pensiä aqçaların urlawnı xup kürä. Xäyer, tizdän alarnı yaña obyekt uzıp kitäçäk. Militsiä xezmätkärläre süzlärenä qarağanda, qışın kübräk tatarstanlılar bik yaratqan mex şapkalarnı urlıylar ikän.

Anıñ qarawı, respublikada yäş ğailälärgä yärdäm arta bara. Kiläse 2005 yılda alarğa toraq aluda yärdäm itü programması qısalarında byudjettan 200 million sum bülenep bireläçäk. Şularnıñ yartısı – respublika, ä yartısı – cirle qaznadan. Läkin bu aqça ğına da bar yäşlärgä citmäyäçäk. Tatarstanda toraq şartların yaxşırtuda 60 meñ yäş ğailä moxtac, digän mäğlümätlär kiterä respublikanıñ Yäşlär häm sport ministrlığı wäkilläre.

28 oktäber könne Qazannıñ Tatar däwlät filarmoniäsendä dönya opera muzıkasınıñ iñ tanılğan äsärlärennän torğan konsert uzdı. Ä tanılğan artist Şäwkät Biktimerov üzeneñ tuğan könen bilgeläp ütte. Aña bıyıl 78 yäş tuldı. Pänceşämbe könne isä Ğäliäskär Kamal teatrı üzeneñ çirattağı sezonın açaçaq. Ğädättägeçä, kamallılar tamaşaçılarğa berençe bulıp Kärim Tinçurinnıñ Zäñgär şäl spektaklen täqdim itäçäklär.

Gölnaz İlgizär

XS
SM
MD
LG