Accessibility links

шимбә, 10 декабрь 2016, Казан вакыты 08:20

Yäşlär tel mä’säläsen qayğırta


Konferensiädä Qazan yuğarı uqu yortları studentlarınnan tış Udmurt, Mari däwlät universitetı, Başqortstannıñ Sibay institutı, Älmät munitsipal' institutı, Alabuğa däwlät pedagogika universitetı uqıtuçıları häm studentları qatnaştı.

Biş törkemgä bülenep eşlägän yäşlär Törki häm fin-ugor telläre häm ädäbiäteneñ tarixı, bügenge xäle turında söyläştelär.

Mari häm Udmurt respublikalarınnan kilgän studentlar yäşlärneñ tuğan tellären belmäwlären borçılıp söyläde.

Udmurt däwlät universitetı talibäse Natal'ya Şudegova bolay di

Bezdä udmurt tele barı milli gimnaziälärdä genä uqıtıla. Üzara barı fakul'tetlarda ğına aralaşabız udmurt telendä. Olılar belä, ämma barıber kübese urısça söyläşä.

Ägär fin-uğor telläre wäkilläre tuğan telläreneñ onıtılıp baruınnan zarlansa, başqortlar häm tatarlar isä kiresençä soñğı yıldağı tel, ädäbiät üseşe belän maqtana aldı. Ayıruça Sibaydan kilgännär başqort teleneñ kiñ qullanışqa ütep kerüen, häm awıldağı ğına tügel, ä qaladağı yäşlärneñ dä üz tuğan tellären öyränergä aşqınuların äytte. Udmurtiädä, Mari respublikalarında tuğan telläre kübräk fakul'tativ räweşendä genä uqıtılsa, Başqortstanda böten mäktäplärdä, yuğarı uqu yortlarında başqort tele mäcbüri kertelgän.

Tatarstanda şulay uq tatar tele uqıtılışı yuğarı däräcädä dip bilgeläp uzdı qunaqlar. Sezdä tel genä tügel, milli mädäniät, ğöref-ğadätlär saqlanğan. Bu Qazan uramında yörgändä ük kürenä didelär. Ämma tatar filologiäse häm tarixı fakul'tetı dekanı İskändär Gıyläcev un yıl elek bulğan därt sünde dip sanıy

1990 yıllarda tatar tele üseş ala başlağan ide. Qızğanıç xäzer bu eş ber qalıpqa salında, eş şulay ber kileş barır dip uylıylar kebek. Däwlättän dä iğtibar kimede. Ämma tel mä’säläse bik çeterekle, aña iğtibar kiräk.

Sez İskändär Gıyläcev fikerlären işettegez.

Konferensiäneñ plenar utırışında seksiälärdä iñ yaxşı çığış yasawçılarnı büläkläw häm fiker alışu buldı. Anda çittän kilgän qunaqlar Tatarstandağı tel uqıtu täcribäsen kiläçäktä üzebezdä dä qullanaçaqbız dip belderdelär.

Landış Xarrasova

XS
SM
MD
LG