Ansar äs-Sönni Armiäse dip atalğan bu törkemneñ internet säxifäsendä alarnı Bağdad belän Hilla arasındağı yulda totıp berseneñ başın kistek, 10-sın atıp üterdek dielä. Säxidäge videoyazmada Ğiraq xärbiläreneñ üz isemnären äytüe häm üterelüe dä kürsätelä. Bu törkem Fällücädä, Sämärrädä, Ramadida häm başqa urınnarda üterelgän ğiraqlılar öçen üç aluın belderä. Başqa ber suğışçan törkem ber polyak xatınnı totıq itep aluın belderde häm Pol'şa ğäskärlären Ğiraqtan çığarunı taläp itte. Pol'şa saqlanu ministrı Jerzy Szmajdzinski bu taläpne şuna uq kire qaqtı. Ul Pol'şa totıq aluçılarnıñ taläplären ütäw belän şöğellänmi dide. Szmajdzinski totıq alınu turında xäbärne raslıy almawı turında äytte häm ber polyak soldatı da yuğalmadı dide. Qatardağı Äl-Cäzirä televideniese olı yäştäge ber xatınnı kürsätte. Anıñ iseme äytelmi. Ul bitlekle ike keşe arasında utırıp tora. Bitleklelärneñ berse anıñ başına pistolet terägän. Üzem Äbü Bakr äs-Siddiq Fundamentalist törkeme dip atawçı bu törkem moñarçı mäğlüm tügel ide. Bağdadnıñ könyağındağı Räşit rayonında maşinağa quyılğan bomba şartlaw näticäsendä kizü kötüçe ber amerikan soldatı häm ber ğiraqlı ülde. Ğisyançı Fällücä şähärendä AQŞ hawa köçläre terrorçı citäkçe Äbü Musab äz-Zärqäwi tarafdarları cıyıla torğan urın dip şiklänelgän yortnı cimerde. Ul hawa höcüme näticäsendä kimendä 2 keşe hälak buldı dip xäbär itelä.
