Reuters xäbär agentlığı Ramallada awır xäldä yatuçı fälestin citäkçese Yassir Arafatnıñ däwalanu öçen Parijğa cibärelü mömkinlege turında belderä. Bu turıda Reutersqa Arafatqa yaqın ber räsmi äytkän. Baqşa ber räsmi älegä qarar qabul itelmäde digän.
Ramalladağı utırmasında awır xäldä yatuçı Fälestin citäkçese Yassir Arafat yanına İordaniädän tabiblar törkeme kilde. Alar arasında Arafatnıñ şäxsi tabibı Äşräf Kurdi dä bar.
İzrail' räsmiläre äytüençä, premyer ministrı Ariel Şaron Arafatqa däwalanu öçen çit ilgä kitüne röxsät itü qararı belän nigezdä kileşkän.
Elegräk İzrail' Arafat Könbatış Yardan kitä ala, ämma kire qaytu röxsät itelmäyäçäk dip beldergän ide.
Kiçä Arafatnıñ yardämçeläre, anıñ waqıt-waqıt añın yuğaltuı turında belderde. Bügen Fälestin räsmiläre Arafat aşıy, söyläşä häm namaz uqırlıq xäldä dide.
