“Qazan utları” jurnalınıñ oktäber sanı Tatarstan Yazuçılar berlegeneñ oyışuına 70 yıl tuluğa häm Tatarstan kitap näşriatına 85 yıl tuluğa bağışlanğan yubiley könnärendä jurnal uquçılar qulına barıp citte. Bu ädäbi- näfis häm ictimaği- säyäsi häm inde siksän yıldan artıq xalıqqa xezmät itkän jurnal bitlärendä kemneñ genä äsärläre yazılmağan da, kemneñ genä äsärläre dönya kürmägän. ”Ädäbiät tarixına äylänep qarasañ”,- dip isemlängän Yazuçılar oyışmasınıñ 70 yıllığı uñayınnan Rawil Fäyzullinnıñ ädäbiät tarixın çişmä başınnan uq çağıldırğan yazması, jurnalnıñ 8-9 sannarında çığıp tämamlanğan ide. Yubiley kiçäsendä dä, meñyıllıq tarixı bulğan tatar ädäbiatınıñ çişmä başında torğan Qol Ğäli, Säif Sarai, Möxämmät'yar, Mäwlä Qolıy, Utız İmäni, Ğabdelcabbar Qandalıy, Ğalimcan İbrahimov, Ğabdulla Tuqay, Kärim Tinçurin, Ğayaz İsxaqi kebek şäxeslärne, bügenge Qamal teatrı artistları, alar çorındağı kiemnären kiep, alarnıñ icat itkän äsärlärennän özeklär uqıp tamaşaçınıñ küñelen yawladı. Jurnalnıñ 10 sanında bu temanı däwam itep SSSR Ädäbi fondınıñ Tatarstan bülege direktorı Liron Xäbibullin 1934 yılda oyıştırılğan Yazuçılar berlegeneñ 1967-83 yıllardağı tarixın xäterli. Ä yubiley kiçäsendä Xäsän Tufan, Sacidä Söläymanova , Sibgat Xäkim , Ğömär Bäşirov, Ämirxan Yenikilarnıñ üzläre isän çaqta alar äytkän süzlärne üzläre icat itkän äsärlärennän özeklärne Azatlıqnıñ internet säxifäsennän tıñlıy alasız. “Qazan utları” jurnalınıñ 10 sanı Äxsän Bayan şiğerläre belän açılıp kitä. Bu yubiley kiçäsendä aña häm Renat Xarisqa Xalıq şağire digän isemne TR Prezidentı Mintimer Şäymiev tapşırdı. Elegräk Tatar xalıq şağirläre iseme birelgän Sibgät Xäkim, Ğamil Avzal, İldar Yuziev , Şäwkät Ğaliev, Rawil Fäyzullin Fänis Yarullinnar törkemenä xäzer Äxsän Bayan belän Renat Xaris östälde. Jurnalnıñ bu sanında “Bezneñ zaman geroe”dip isemlängän diskussiägä Daniä Zahidullina qatnaşa. Anıñ yazması “Uñay geroy yuğalu”: säbäplär, näticälär digän tema astında bara. Soñğı çorda basılıp çıqqan äsärlärne, kitaplarnı küzätülärennän misallar kiterep: “Bügenge ädäbiättä yaña geroylar yuq tügel. Läkin alardağı ürnäk bulu xasiäte , xolıq-figıyl', eş-ğamäl, uy-fiker, xis- mönäsäbät berlegendä çağıldırılmıy, nindi dä bulsa ber yaq, sıyfat qına qalqıtıla”,- di avtor. Ämma tänqidi, lirik, psixologik, intellektual' başlanğıçlarnıñ alğa çığuı, milli ädäbiättä uñay bäyälänergä tieşme, tatar ädäbiätı dini propaganda çarası bularaq, äxlaq-üget wazifaların üz cilkäsenä alıp, äxlaqlı uñay geroy yärdämendä uquçığa tä'sir itü yulın saylarğa tieşme?” digän mäs'älä qalqa ,- di Daniä Zahidullina. Häm süzen däwam itep ul bolay di:“Älbättä bügen tatar cämğiäte dini traditsiälärne , imanlılıq, kebek qimmätlärne tergezä. Yäşlärneñ ber öleşe keşeleklelek däreslären dini belem-mäğlümat yärdämendä üzläşterä. Dimäk, dini ädäbiät ta yazılır,- digän ömet belän çığa avtor bu diskussiägä. Jurnalda , älbättä, tağın bik küp material birelä. Şiğriät häm çäçmä äsärlär arasında : Bay icatlı oluğ şäxes Mostay Kärimneñ şiğerläre urın alğan. Xisam Kamalovnıñ “Üksezlär” romanı, Marat Ämirxanovnıñ“Mökärrämä” poveste, Rafael' Xäkimneñ “Qayda bezneñ qibla?” dip atalğan kitabınnan özek birelgän, Näcibä Safinanıñ “Qara şikär” isemle istälek xikäyäse, Tälğat Näcmiewneñ “Saba xikmätläre” häm başqa bik küp ädäbi yazmalar urın alğan jurnalnıñ bu sanında . Mälikä Basıyr ,Qazan.