Accessibility links

чәршәмбе, 7 декабрь 2016, Казан вакыты 19:29

Başqortstan citäkçelege Putin täqdimnärenä törleçä qaraşta


Soñğı könnärdä Başqortstannıñ yuğarı citäkçeläre Rusiä töbäkläre başlıqların kiläse yıldan saylap tügel, ä täğayınläp quyu turında prezident Putin täqdimenä qarata üz fikerlären yañğırata başladı. Älegä il citäkçelegenä häm Däwlät dumasına nindider räsmi möräcägätlär cibärelmäde. Şulay da üz fikerlären äytüdä Başqortstan citäkçelege üzäk matbuğat çaraların qullana. Mäskäwneñ qayber matbuğat basmaları bü mäsälädä Başqortstan Däwlät Cıyılışı räise Konstantin Tolkaçevnıñ da fikeren beleşte. Tolkaçev äfände Putin reformalarınıñ ğömümän alğanda kiräkle buluın äytep, anıñ qayber öleşlärenä tänqit küzlegennän dä bäyä birde. Ul ayıruça Rusiä prezidentınıñ töbäklär parlamentların quıp taratu ixtimallığınıñ döres bulmawına basım yasadı. «Älege xäl ildä tuqtawsız parlament krizisına kiterüye mömkin», – di Konstantin Tolkaçev. Töbäklär citäkçelären täğayınläp quyu turındağı qanunnı Däwlät Dumasında ikençe uquda qaraw aldınnan, Başqortstan parlamentı bu mäsälädä üzeneñ mönäsäbäten belderergä cıyına ikän. Monı da Başqortstan parlamentı spikerı äytte. Şulay itep, Tatarstan citäkçelegeneñ häm, ayırım alğanda, prezident Mintimer Şäymievneñ Putin täqdimnäreneñ qayber polojenielärenä qatği däğwa belderüye Başqortstannıñ qayber citäkçelären dä qıyulandırıp cibärde, şikelle. Kiläçäktä başqort türäläreneñ fikere tağın qaysı yünäleşne alır, anısın waqıt kürsäter. Prezident Mortaza Räximov isä atnaqiç könne Rusiäneñ NTV telewidenie qanalına birgän äñgämäsendä Putinnıñ täqdimen tulısınça xuplawın belderde: "Vladimir Putinnıñ töbäk citäkçelären saylaw qanunına üzgäreşlär kertü täqdime döres, – dide Mortaza Räximov. – Citäkçelärne täğayınläp quyu praqtiqası bezneñ Başqortstanda 1993 yıldan birle qullanıla inde. Min rayonnar häm şähärlär başlıqların üzem täğayınlim." Şulay itep, Putinnıñ täqdimen xuplaw belän bergä, Mortaza Räximov Başqortstannıñ bu mäsälädä dä bar dönyadan alda baruı belän maqtanıp quydı.

XS
SM
MD
LG