Accessibility links

якшәмбе, 11 декабрь 2016, Казан вакыты 05:19

Başqortstanda Tatar milli - mädäni möxtäriätlären terkäw qarşılıqqa oçrıy


Başqortstanda Tatar milli – mädäni möxtäriätläreneñ urınnardağı büleklären tözü eşläre däwam itkän ber waqıtta alarnı räsmi terkäw eşläre körçekkä terälde, şikelle. Älege eştä, aldan uq kötelgänçä, respublik xaqimiätläre quşuı buyınça bulsa kiräk, Rusiä Yüstitsiä ministrlığınıñ Başqortstan idaräse çinovnikları kirtä qora. İnde xäbär itelüençä, bu atna başında tatar milli oyışmaları Dürtöyle rayonında häm şähärendä oyıştırılğan tatar milli – mädäni moxtariäten räsmi terkätü öçen barlıq doqumentlarnı şuşı idarägä tapşırğan ide. Ämma idarä wäkilläre qırıqmasa qırıq säbäp tabıp, ul doqumentlarnı kire bordı. İmeş, anda bik küp citeşsezleklär bar. Elegräk tä xäbär itelüençä, Başqortstan rayonnarında tatar milli – mädäni moxtäriäteneñ urınnardağı bülekläre tözelep häm alarnıñ qayberläre räsmi terkälep, bu yılnıñ 27 noyabrendä respublik tatarlarınıñ zur qorıltayı ütärgä tieş ide. Näq şunda uq Tatar milli – mädäni moxtäriäteneñ respublik bülegeneñ oyıştıru cıyını da bulır dip kötelgän ide. Ämma yaqın aralarda rayonnarda oyıştırılğan urınnardağı moxtäriätlärne räsmi terkäp ölgermäsälär, bu qorıltaynı cıyunıñ mäğnäse dä qalmıy. Şulay itep Başqortstan citäkçeläreneñ respublikta tatar milli – mädäni moxtäriätlären tözüne buldırmaw planı älegä tormışqa aşıp bara kebek. Ämma tatar milli oyışmaları citäkçeläre üzläre kiläçäkkä zur ömetlär belän qarıy häm moxtäriätlärne terkätü buyınça eşlärne, bernigä qaramıy, däwam itärgä cıyına. Moxtäriätlärne terkäw belän kilep tuğan qıyınlıqnı tikşerü öçen Ufada 29 üktäber könne qayber tatar milli oyışmaları wäkilläre üzläreneñ kiñäşmäsen ütkärep aldı. Anda aldağı könnärdä bu xäldän nindi xoquqıy yullar belän çığa alu mömkinlekläre qaraldı. Yüstitsiä idaräse wäkilläreneñ nigezsez däğwalarına qarşı köräşüneñ törle yulları barlığı açıqlandı älege kiñäşmädä. Xoquq belgeçläre yärdämendä moxtäriätlärne terkätüdäge qarşılıqlar alıp taşlanırğa tieş. Başqortstan Tatar ictimağıy üzäge räise Ayrat Ğiniätullin äytüençä, bu qarşılıqlarğa barı tik şundıy uq köçle ücätlek belän genä cawap birergä kiräk. "Bäläbäy belän Böre şähärlärendä oyıştırılğan tatar milli - mädäni möxtäriätlären dä räsmi terkätü öçen, tieşle barlıq doqumentlar şuşı arada RF Yüstitsiä ministrlığınıñ Başqortstan buyınça idaräsenä tapşırılaçaq, – di Ayrat äfände. – Bu yulı idarä wäkilläre ul doqumentlarnı kire borıp çığaru öçen tağın nindi säbäplär uylap tabar, qarap qararbız". İsegezgä töşeräbez, äle respublikanıñ yegermedän artıq rayonında häm şähärendä milli – mädäni möxtäriätneñ büleklären tözü buyınça oyıştıru cıyılışları bulıp ütte. Küp urınnarda moxtäriätlärne tözü eşe dä, xaqimiätlärneñ qarşılığı arqasında, bik awırlıq belän barğan ide.

Fänis Fätxi, Ufa

XS
SM
MD
LG