Accessibility links

чәршәмбе, 7 декабрь 2016, Казан вакыты 17:30

Qazaqstan tatarları problemaları ike Prezidentnıñ iğtibar üzägendä buldı


Qazaqstanda 2 kön barğan Tatarstan respublikası könnäre tämamlandı. Respublika wäkilläre 28 üktäber kiçendä Qazanğa qaytıp töşte. İnde xäzer qayber näticälär dä yasarğa bula. «Xabar» agentlığı xäbär itkänçä, Tatarstan citäkçesen Qazaqstan citäkçese qabul itkän, annan soñ Tatarstanlılar Qazaqstan xökümäte räise belän oçraşqan, biznes-forum eşendä qatnaşqan. İke respublika arasında tovar äyläneşe 126 million dollarnı täşkil itä. İqtisadi oçraşularda xezmättäşlekne üsterü turında kileşelgän bulğan. Mäsälän, Qazaqstan saqlanu ministrlığı Qazan boralaqların satıp alırğa uylıy, şulay uq, Qazaqstannı Tatarstannıñ nefteximiä ölkäsendä eşläw täcribäse qızıqsındıra. Moña qädär iñ uñışlı ike yaqlı proyekt itep, «Qazaqstan-KamAz» şirkäte sanaldı. Qazaqstanda KamAZ maşinalarnı ğına cıyılğan bulsa, xäzer avtobus, traktorlarnı cıya torğan qorılışlarnı başlaw turında söyläşep qaytqannar. Bu xaqta «Xabar» ağentlığı xäbär itte. «İntertat» agentlığı tatar belän oçraşu turında da xäbär itte. Ul opera häm balet teatrınıñ keçkenä ber zalında ütkän. Anda 15 töbäktän tatar-başqort oyışmaları citäkçeläre qatnaştı, dip xäbär itte bezgä Astanadağı millättäşebez Färidä Batırbayıva. Cıyılışnı «İdel» tatar-başqort oyışmalar assotsiäse räise Murat Karimov alıp barğan. Anda Mintimer Şäymiev häm Qazaqstan mädäniät ministrı qatnaşqan. Qunaqlar aldında, Qazaqstannıñ törle ölkälärennän kilgän millättäşlärbez çığış yasap, moñ-zarları belän büleşkän. Mäsälän, Tönyaq Qazaqstan ölkäsennän kilgän Räisä Bikmöxämmätova Petrapaw aşa Qazanğa poyezd belän barıp bula xäzer, Tatarstan, hawa yulın buldırırğa, oçışlarnı oyıştırırğa yärdäm itä almas mikän, digän täqdim beldergän. Astana tatarları wäkile Ablakov Rafael äfände, problemalar turında söylägänçe, ber tatar cırınnan özek belän, soraw birde. «Bez sağınnğannı beldeñme, ällä üzeñ sağınıp kildeñme?», digän sorawğa Mintimer Şäymiev «Sez sağınğannı beldem, üzem dä sağınıp kildem» dide. Annan soñ tatarlar problemalar xaqında da söyläde. Almatı, Astanı, tağın ber niçä zur şähärdä, tatar yäkşämbe mäktäpläre bulsa da, başqa töbäklärdä -yuq. Alarda balalarnı uqıtırğa däresleklär citmi häm yaxşı uqıtuçılar da - yuq. Urta belem birü mäktäplärendä, fakul’tativ räweştä, tatar tele däreslären oyıştıruğa, Tatarstan yärdäm itmäs mikän?, dip sorağan tatarlar. Şunnan soñ, Qazaqstanda Saban tuyına Däwlät bäyräme statusın birergä telär idek, digän alar. Tatarstan Prezidentı barısın da tıñlap çıqqannan soñ, cawap süzendä, qulınnan kilgän qädär yärdäm itärgä wäğdä itte. Uqıtuçılar äzerläwdä, ul Tatarstannan belgeçlär cibärep, berniçä aylıq kurslar aşa Qazaqstanda uqıtuçılar äzerlärgä täqdim ite. Tatar konsertlarnı, teatrlarnı küptän kürgän yuq, digängä Mintimer Şäymiev, yul çığımnarın kütärergä Tatarstan yärdäm itä ala, dip äytte. Tatarstan prezidentı, Qazanğa qaytıp kitkänçe, Qazaqstan prezidentı belän tatarlar äytkän problemalar turında söyläşergä wäğdä itkän. Bu oçraşuda yañğırağan çığışlar häm Astana tatarlarınıñ yäşäyeşe turında tulıraq itep, «Azatlıq»nıñ aldağı tapşırularında söylärbez.

Bikä Timerova.

XS
SM
MD
LG