Üzbäkstannıñ könçığışındağı bu şähärendä bazarda bügen çualışlar buldı. Qıtaydan kiterelgän mallarnı satuçılar – naçar sıyfatlı tawarlarnı konfiskasiälärgä kilgän polisiä häm salım xezmäte räsmilären qıynadı häm taşlar attı, dip xäbär itelä. Qarşılıq çarasında barlığı 2 meñgä yaqın keşe qatnaşqan. Cirle satuçılar xakimiätneñ çittän kiterelgän mallarğa qarata yaña tärtip kertüenä qarşı. Bazardan ber törkem satuçılar şähär xakimiätenä barıp bina qarşında piket oyıştırğan. Üzbäkstanda bulıp kitkän Yevropada İminlek häm Xezmättäşlek Oyışması wäkile Marti Ahtisaari, 26nçı dekabergä bilgelängän parlament saylawlarında oppozisiä firqaläreneñ qatnaşmawı, "qızğanıç" dip belderde. Saylawlarda 5 partiä qatnaşaçaq, alar barısı da prezident İslam Kärimov yaqlı. Oppozisiädäge qayber firqalär saylawlarğa qatnaşırğa teläk beldergän ide, ämma alar terkälä almadı. Üzbäkstanğa Yevropada İminlek häm Xezmättäşlek Oyışması küzätüçeläre cibäreläçäk.
