Accessibility links

якшәмбе, 11 декабрь 2016, Казан вакыты 01:36

Ğiraq premier-ministrı, ğisyançılar Fallucadan kitmäsä, höcüm belän yanıy


Ğiraqnıñ waqıtlı premier-ministrı Ayad Allawi, çit il suğışçıların Fallucadan quıp çığaru öçen waqıt betep kilä, Falluca xalqı üze eşlämäsä monı amerikan häm Ğiraq xärbiläre başqaraçaq, dip kisätte. Kilgän xäbärlärgä qarağanda, şähärne qamap alğan amerikan xärbiläre xärbi ğämälgä äzerlänä.

Bu kisätüen Ayad Allawi yäkşämbedä Bagdadnıñ nıqlap saqlanğan Yäşel bistäsendä yasadı. Ägär Falluca citäkçeläre Ğiraq xökümätenä bu sönni şähärdä kontrol urnaştırırğa mömkinlek birmäsä, amerikan häm Ğiraq xärbiläre anı köç belän alaçaq, bu oçraqta tınıç xalıq arasında qorbannar bulırğa mömkin, läkin bezneñ başqa çarabız yuq, dide ul:

Audio (Ayad Allawi): "Tınıç yul belän xäl itep bulmasa, xärbi yudan başqa çara yuq, di Allawi. Min moña awır küñel belän baram, çönki nindi genä saqlıq belän eş itsäk tä, barıber ğonahsız qorbannar bulaçaq."

Tögäl könne bilgelämäsä dä Allawi, qarar qılu öçen waqıt betep kilä, dide. Falluca mäsäläsen söyläşülär aşa xäl itü tırışlıqları moñarçı näticä birmäde. Ğiraq xökümäte çit il suğışçıların häm ğisyançılarnı şähärdän kitergä, awır häm urta awırlıqtağı qoralların tapşırırğa taläp itä. Falluca wäkilläre isä - şul isäptän din ähelläre, qabilä başlıqları - çit il suğışçıları şähärdän inde kitte, şuña kürä Bagdadnıñ taläben ütäp bulmıy, dip cawap birä.

Ul arada şähärne qamap alğan amerikan xärbiläre anda östämä köçlär kiterä, ixtimal höcümgä äzerlänä. Ğisyançılar nığıtması dip sanalğan urınnar bolay da berniçä atna rättän hawa häm artilleriä utına totıla. Ber Falluca keşese bu höcümnärne bolay sürätläde:

Audio (Falluca keşese): "Amerikan oçqıçları Fallucanıñ törle urınnarın bombalıy, bigräk tä Äl-Äskäri häm Äl-Şohada tiräsen. Berniçä kibet häm toraq yortlar utqa totıldı. Şähärdäge qorallı keşelär moña qarşılıq kürsätä. Ämmä bombalaw köçäyä häm dä zur sanda amerikan tankları olı yul buylap Fallucağa taba kilä."

Amerikan räsmiläre, Fallucada 2dän alıp 5 meñgä qädär suğışçı bar dip sanıy. Ber öleşe - Saddam taraflı elekke Ğiraq xärbiläre, qalğannarı – İordaniäle Äbü Musa Äl-Zarqawi taraflı islamçılar.

Şuşı yılnıñ April-May aylarında Amerikan xärbiläre belän ğisyançılar arasında 6 atna barğan häm yäzlägän keşeneñ ğömeren özgän bäreleşlärdän soñ solıx kileşüe tözelgän ide. Şähärdäge iminlek öçen cawplılıq zamanında Saddam armiäsendä xezmät itkän ofitserlar citäklägän "Falluca brigadası" dip atalğan köçlärgä tapşırıldı. Ämmä alar şähärne ozaq tota almadı, kontrol tiz arada ğisyançılar qulına küçte. Xäzer Allawi xökümäte, ğinwar saylawları yaqınayğan sayın, bu kontrolne qaytarırğa tırışa. Falluca häm dä kürşe Ramadi buysınmağan xäldä, Ğiraqnıñ üzäk töbägendä saylawlar ütkärü awır bulaçaq.

Tik menä monıñ öçen yänä amerikan xärbilärenä möräcäğät itergä kiräkme-yuqmı digän sorawğa kilgändä, qarşılıqlı fikerlär bar. Misal öçen, düşämbedä Ğiraq prezidentı Ğazi Äl-Yawar, min bu mäsäläne xärbi yul belän xäl itü yağında tügel, dide. Äl-Yawar söyläşülärne däwam itergä çaqırdı. Bu oçraqta ğadi xalıq ğisyançılarnı xuplawdan tuqtayaçaq, dide ul.

-Ali Gilmi
XS
SM
MD
LG