Accessibility links

Кайнар хәбәр

Tatarstannan çittä yäşägän tatarlar <br> latin imlasına qarata nindi fikerdä?


Säläm duslar, Azatlıqnıñ yäkşämbe utırmasına räxim itegez. Bügen anı min AĞ alıp baram häm sezne latin imlası turında fiker alışuğa çaqıram.

Belüegezçä, şuşı könnärdä Rusiäneñ konstitutsiä mäxkämäsendä, tatarlarnıñ üz beldegenä älifba saylaw xoquqı barmı-yuqmı, digän mäsälä tikşerelä. Mäxkämä başlanuğa turı kiterelep Rossiyskaya gazeta basmasında ike distä tatar atlı zıyalınıñ Tatarstan citäkçelärenä möräcäğäte dönya kürde. Bu xatnı imzalawçılar, Tatarstan citäkçelären älifba mäsäläsen xäl itkändä çittä yäşägän millättäşlärebezne dä iskä alırğa çaqıra. Nişläpter, näq menä çittäge tatarlar latinğa ayaq teräp qarşı bulır digän ber qaraş bar. Tatarstannan çittä yäşägän millättäşlärebezneñ fikere çınlap ta bik möxim. Häm bez monı üzebezneñ törle töbäktäge xäbärçelärebez aşa beleşergä buldıq. Xäzer sez Başqortostan, Omski, Sember, Tubıl häm Yıraq Könçığış töbäklärendä yäşäwçe millätäşlärebezneñ bu mäsälägä qaraşın işetersez. Başlap süzne Başqortstandağı xäbärçebez Fänis Fätxigä biräm. Çittäge tatarlarnıñ iñ zur öleşe näq menä anda yäşi. Küprän tügel Başqortstan tatar oyışmaları latin älifbasına qarata üzläreneñ urtaq fikeren belderde.

Yazmalar: Fänis Fätxi, Ufa Rozalia Sayğanova, Omski Ayrat İbrahim, Sember İra Tacieva, Amurdağı Komsomolski Nail Alan, Tömän

Sez Rusiäneñ törle töbäklärendä yäşägän tatarlarnıñ latin imlasına qarata fikeren işettegez. Älbättä bu yazmalardan alarnıñ barısı da latin yaqlı digän näticä yasaw döres bulmas. Ämmä şul açıq: çittäge tatarlar latinğa qarşı digän sıltaw, yomşaq itep äytkändä, urınsız. Rusiä konstitutsiä mäxkämäseneñ aldan kötelgän qararına cawap ğämäl äzerlägän Tatarstan räsmiläre monı iskä alır dip ışanası kilä. Bügenge utırmabız axırına yaqınlaştı. Uy-fikeregez bulsa, räxim itegez, internet adresıbız: www.azatlıq.org. Sezneñ belän AĞ buldı, isän-saw bulığız.

-Ali Gilmi
XS
SM
MD
LG