Accessibility links

пәнҗешәмбе, 8 декабрь 2016, Казан вакыты 09:10

Qazanda Xäter xäyriä aksiäse uza


Noyäber başı Tatarstanda säyäsi waqiğalar, xäbärlärgä ällä ni bay tügel. Älegä respublikada iqtisadi, sotsial temalar iğtibar üzägendä tora. Bigräk tä bu könnärdä xalıqnı bäyälärneñ üsüe borçıy. İnde xäbär itkänebezçä, 1 noyäberdän respublikada söt aşamlıqları qimmätlände. Xäyer, bar matbuğat çaralarında da aldan äytelep quyğan ipigä bäyä üsmäde. Läkin, belgeçlär fikerençä, älege üseş bu düşämbedän bulmasa da, tiz arada barıber kötelä. Şuña da qaramastan, Tatarstanda azıq-tölekkä bäyälär İdel buyı töbäkläre arasında iñ tübän däräcädä qala birä, dip xäbär itä Tatarstan söte şirkäte wäkilläre. Şulay uq respublika federal’ qaznağa salımnarnı tüläw buyınça da İdel buyı okrugında berençe urında tora. Bıyıl Mäskäwgä kitkän aqça uzğan yıl belän çağıştırğanda kübräk, dip yaza Vremya i den’gi gäcite.

Xäyer, tatarstanlılarnı bäyälär, azıq-tölek mäs’äläläre belän genä borçımıy. 2 noyäberdän respublikada Xäter burıçı dip isemlängän xäyriä aksiäse ütä başladı. Bu çara Tönyaq Kavkazda häläk bulğan Rusiä Eçke eşlär ministrlığınıñ xezmätkärläreneñ ğailä äğzäläre öçen oyıştırılğan. Xäyriä çarası bıyıl inde ikençe märtäbä uza. Anda 100dän artıq keşe, şul isäptän, häläk bulğan militsionerlarnıñ balaları, ata-anaları, qatnaşa. Aksiä qısalarında alar öçen Qazannıñ kremle, Raifa monastırenä ekskursiälär oyıştırılaçaq, balalarnı isä Qazannıñ akwaparkına alıp baru qaralğan. Xäyriä çarası 4 noyäbergä qädär däwam itäçäk.

Şuşı könnärdä Qazanğa Rusiäneñ Fän häm mäğärif ministrı Andrey Fursenko kilergä tieş ide. Läkin ul üzeneñ vizitın 17 noyäbergä kiçekterde. Fursenko Tatarstanğa Qazan däwlät universitetınıñ 200 yıllıq yubileyına bağışlanğan çaralarda qatnaşırğa kiläçäk. Ä älegä respublikanıñ vitse-premyerı Zilä Wälieva üze Mäskäwgä barıp, ministr belän aralaşıp qayttı.

2 noyäberdän Qazanda xalıqara meditsina ädäbiyatı kürgäzmäse eşli başladı. Älege tarmaqtağı yaña kitaplar belän tatarstanlılar 4 noyäbergä qädär tanışa alaçaq. Respublikanıñ deputatları isä üzläreneñ çirattağı utırışlarına cıyılırğa äzerlänä. Sişämbe könne Tatarstan parlamentı prezidiumı bu utırışnı 11 noyäber könenä bilgeläde. Sessiäneñ çirattağı utırışında 37 soraw qaralaçaq. 3 noyäberdä Tatarstannıñ İminlek Şurasınıñ utırışı da kötelä. Anda narkotiklar belän köräş xaqında süz baraçaq. Çärşämbe könne Mintimer Şäymiev isä respublikanıñ sälätle balaları belän oçraşaçaq.

Gölnaz İlgizär

XS
SM
MD
LG