Accessibility links

пәнҗешәмбе, 8 декабрь 2016, Казан вакыты 19:09

Äceğol balaları Yekaterinburg säxnäsendä


Küptän tügel Yekaterinburgta tatar cırı bäyräme uzdırıldı. Tatar eşmäkärläre tarafınnan tözekländerep, ayaqqa bastırılğan Elmaş mädäniät sarayında mondıy bäyrämnärne ay sayın uzdırıp torırğa isäplilär. Bäyrämne oyıştıruçı Milli Media-Xolding citäkçeläre Sverdlov ölkäseneñ törle poçmaqlarına sibelep yäşägän tatarlar arasındağı icadi cäwhärlärne ezläp tabıp, alarnı xalıq arasına çığaru, millätebezneñ moña qädär saqlanıp qalğan küñel xäzinälären Yekaterinburg tamaşaçısına kürsätüne üzlärenä maqsat itep quydılar. Berençe bäyrämgä Äceğol awılınnan “Kübäläk” balalar fol'klor ansamblen çaqırıp kiterdelär. “Kübäläk”lär üzläreneñ eçmälekle, matur çığışları belän genä tügel, säxnädä üzlären çın artistlarday irken, ğadi totuları belän dä tañ qaldırdılar. Utızlap baladan torğan kollektiv Yekaterinburgqa ike säğätlek programma alıp kilgän ide. “Su buyında” dip atalğan programma ike öleştän tora. Teatralläşterelgän bu muzıkal' küreneş ber tında qarala. Nilär genä kürsätelmäde biredä! Cäyge esse köndä su buyına töşkän balalar uyını da, balalar belän uynarğa kilgän Su anası belän Su qızı da, qızu peçän öste dä, kiçke yäşlär uyını da... Barlıq cırlar da, iyüllär dä “tere” muzıkağa, yäğni balalar üzläre uynağan xalıq uyın qoralları ansamble köyenä bardı. Vinarit Wälişev belän Ruzanna Gaynizamanova cırda da, biyudä dä üzlären iñ osta artistlar itep tanıttılar. Vinaritnıñ biyugä bik sälätle buluı ayırmaçıq kürenä. Ul çın biyuçe bulırğa xıyallana ikän. Ansambl'neñ iñ yäş cırçısı, 7 yäşlek Ramis üzeneñ yañğırawıqlı tawışı belän yarattırdı. Şuşı balalar belän canın-tänen birep, armıy-talmıy eşlägän Ğäliä xanım Zäynullina üzeneñ yazmışın alardan ayırılğısız itep sanıy. Anıñ xezmäteneñ cimeşläre inde küzgä kürenä: “Kübäläk” ansamble Ärtä rayonında iñ yaxşı balalar ansamblennän sanala, rayon külämendä uzdırılğan ber genä çara da alardan başqa ütmi. Tatar mädäniäten, tatar cırların, tatar iyüllären başqa xalıqlar mädäniäte arasında änä şulay yuğarı kütärüçe keşelärneñ berse ul Ğäliä apa. Ä inde ansambl'gä yörüçe balalarnıñ Yekaterinburg cirenä kilep, zur säxnälärdä çığış yasawların ul sabıylar küñelenä mäñge uyılıp qalırlıq waqiğa dip sanıy. Bu eşkä yärdäm itüçe, Milli Media-Xoldingnı ğämälgä quyuçı Rinat Sadriev, Rinat Askarov, Al'bert Abzalovqa häm bu eşne oyıştıruçı Milli Media-Xolding citäkçelärenä räxmäte çiksez anıñ. Kiçädä balalarğa istälekle büläklär tapşırıldı. Konsertnı qararğa kilgän tamaşaçılar öçen dä, balalarnıñ üzläre öçen dä bu waqiğa bik zur bäyrämgä äwerelde.

Fäwiä Safiullina, Yekaterinburg

XS
SM
MD
LG