Accessibility links

җомга, 9 декабрь 2016, Казан вакыты 10:49

AQŞta Kongress saylawları näticäse


2-nçe Noyäberdä AQŞta tik prezident saylauları ğına tügel, ä Väkillär palatasına häm Senatqa da saylaular ütkärelde. Älbättä, töp ähämiät prezident saylaularına birelsä dä, amerikan kongressına saylaular da zur ähämiätkä iä. Yaqınça näticälärgä qarağanda, Respublikannar Partiäse Senattağı häm Väkillär Palatasındağı küpçelegen saqlap qalu belän genä çiklänmiçä, kongressmen häm senatorlar sanın arttırğan.

Dönyanıñ diqqäte AQŞta prezident saylaularında kemneñ ciñep çığaçağına yünälgän. Läkin, anda prezident saylaularınnan tış Kongressnıñ här ike palatasına da saylaular ütkärelde. Här ike palatada da respublikannar üz pozitsiälären nığıttılar. Buş ta ciñep çıqqan xäldä, Aq Yortta respublikan prezident, Kongressnıñ här ike palatasında respublikan partiäse väkiläre küpçelekne täşkil itäçäklär. Bu inde Buşqa salımnarnı kimetü häm bala töşerüne tıyu kebek konservativ köntärtiben ütkärüenä yardäm itäçäk. Senatqa saylaularda kötelmägän ike vaqiğä buldı. Alarnıñ berse Demokratik Partiäneñ Senattağı azcılıqnıñ räise Tom Daşleneñ Könyaq Dakotada yañadan saylana almıyça, urnın köndäşe respublikan partiäse kandidatı John Thunegä yuğaltuı buldı. Soñğı 50 yılda mondıy närsäneñ bulğanı yuq ide äle. Läkin, demokratlar İllinois ştatında zur ciñügä dä ireştelär. Anda änise aqtänle amerikanlı, ätise afrikan möselmanı bulğan Baraq Obama, moña çaqlı respublikannar qulında bulğan urınnı yaulap alıp senator itep saylandı. Ul ciñep çıqqanı mäğlüm bulğannan soñ yasağan çığışında bolay dide

Audio

"Qayberävlär bezneke kebek üzara bülgelängän ber ildä minem kebek beräv AQŞ Senatına kerü öçen omtılmasqa da tieş dip uylağannardır. Qurqu eçendä yäşägän ber dävlättä Barak Obama isemle beräv ber vaqıtta da saylana almas dip uylağannardır. Läkin, amerikan xalqı häm bezneñ konsepsiäbez başqa buluı säbäple, min monda basıp toram."

Ul yaña Senatta berdän ber qaratänle bulaçaq. Senat häm Kongressqa saylaular turındağı mäğlümätlär yaqınça näticälärgä tayanıp birelä, qayber urınnarda qätği näticälär äle iğlan itelmäde. Şulay da küpçelek urınnarda näticälär bilgele häm Väkillär Platası belän Senatta respublikannarnıñ küpçelekne saqlap qalçaqlarına ber nindi dä şik yuq.

Färit İdelle, Praga.
XS
SM
MD
LG