Accessibility links

Кайнар хәбәр

Yekaterinburgtağı Tınıçlıq häm Duslıq yortında milli-mädäni oyışmalar citäkçeläreneñ çirattağı utırışı bulıp uzdı


Utırışta qatnaşuçılar Tınıçlıq häm Duslıq yortınıñ xucası Tahir Äsxät ulı Soltanovnıñ Rusiä Prezidentı Vladimir Putin Ukazı buyınça Duslıq ordenı belän büläklänüe uñayınnan, anı bu yuğarı büläk belän täbrik ittelär. Tahir äfändeneñ küpmillätle Sverdlov ölkäsendä xalıqlar duslığın nığıtu buyınça başqarğan eşlären yuğarı bäyäläp, aña nıqlı sälämätlek, kiläçäktä dä bu eştä zur uñışlarğa ireşüen telädelär.

Bu yulı utırışqa cıyılunıñ maqsatı bik citdi buldı. Sverdlov ölkäse gubernatorı qarşında eşläp kilgän millätlär buyınça konsul'tativ sovet milli oyışmalar citäkçeläre qaramağına ber dokument täqdim itte. Bu dokument nigezendä öç yaqlı kileşü tora. Berençe yaq - ölkä xökümäte, ikençe yaq – eçke eşlär idäräse, öçençe yaq – milli-mädäni oyışmalar. Kileşüdä öç yaqnıñ da millätara kileşmäwçänlekne buldırmaw, tolerantlıqnı saqlaw, grajdannarnıñ Konstitutsiä birgän xoquqların yaqlaw buyınça bergäläp eşläwe qarala. Älege kileşü çınlap torıp eşläsen öçen, konsul'tativ sovet qarşında maxsus koordinatsion komissiä tözelde. Komissiä maxsus nigezlämä nigezendä eşläyäçäk.

Mondıy eşne başlap cibärüneñ säbäbe nidä soñ? Yekaterinburg şähäreneñ çeçennar milli-mädäni oyışması citäkçese Adam äfände Kalaev monı ölkädäge demografik wazğiätneñ könnän-kön üzgärüe belän añlata.

Biregä waqıtlıça eşkä yäki daimi toru urınına küçep kilüçe Bäysez Däwlätlär Berdämlege grajdannarı küp oçraqta zakon qısalarına sıyu yağın uylap betermiçä döres eşlämilär. Tärtip saqlaw orğannarı xezmätkärläre yağınnan da tayaqnı qatıraq bögü oçraqları küp. İke yaqtan da üzara mönäsäbätlärdä zakon bozu oçraqları bulğalıy. Mondıy nigezsez xällärgä yul quymas öçen, eçke eşlär idäräse milli-mädäni oyışmalar belän tığız elemtädä eşlärgä tieş. Häm bu mönäsäbätlärneñ xökümät kontrole astında buluı zarur. Öç yaqlı Kileşü tözelü küp kenä problemalarnı çişärgä yärdäm itär, dip ömetlänälär dokument östendä eşläwçelär.

Utırışta qatnaşuçı milli-mädäni oyışmalar citäkçeläre Kileşü astına qul quyarğa bertawıştan riza buldılar.

Fäwiä Safiullina. Yekaterinburg.

XS
SM
MD
LG