Accessibility links

шимбә, 25 февраль 2017, Казан вакыты 03:05

Omskinıñ "Umırzaya" tatar-başqort ansamble xäyriä konsertı belän balalar yortında bulıp qayttı


Anda tärbiälänüçe balalar aldında tatar kollektivı belän berrättän, qazaq, ärmän üzeşçännäre dä çığış yasadı. Üzeşçännärneñ bu köndälek digändäy eşe turında ayırım söyläp torunıñ bälki kiräge dä bulmas ide, ägär dä älege balalar yortı başqalardan küpmillätle buluı belän ayırılıp tormasa, häm anda balalar belän maxsus eş alıp barılmasa. Bu balalar yortında ruslardan qala, tatar, qazaq, törekmän balaları da tärbiälänä ikän.

Bu, balalar yortı direktorı Svetlana Koxiä buldı. Anıñ süzlärençä, elegräk balalar yortlarında möselman ömmätennän bulğan balalar az bulğan. Yätim qalğan oçraqlarda alarnı tuğannarı tärbiägä alğan. Ä xäzer ällä dönya, ällä keşelär üzgärde, yätimnär genä tügel, xätta äti-äniläre isän bulğan balalar da bezgä elägä,- di Svetlana Koxiä. Aldan äytkänemçä, biredä balalarğa berniqädär milli tärbiä dä birelä. Döres, milli tärbiä asılda törle millät xalıqlarınıñ yolaları, ğöref-ğadätläre, mädäniäte belän tanıştırudan ğibärät. Häm bu eş belän ber genä keşe – qazaq millätennän bulğan tärbiäçe şöğellänä.

Menä şundıy räweştä bulsa da törle millätlär belän tanışıp, balalar biredä üzläreneñ dä nindi millättän buluların belep üsälär. Älbättä eş şunnan yıraqqa kitmi. Tatar balalarına da, qazaq balalarına tel öyrätelmi, andıy maqsat quyğanıbız yuq, ğomum programma belän eşlibez, - dide direktor. Şulay da, tatar oyışmaları tarafınnan räsmi möräcäğät bulğan oçraqta, tatar balaların tatar kollektivları konsertlarına cibärergä wäğdä itte balalar yortı direktorı Koxiä xanım.

Konsertlar digännän, Omski tatarlarına tizdän mädäni-ruxi ixtiacların cirle üzeşçännär konsertları belän genä qanäğätländergä turı kiler axrı. Märkäzebez Qazannan kilgän sänğat ostaların kürü sirägäygännän-sirägäya bara. Tatarstan artistları konsertı Omskida soñğı märtäbä 2002-nçe yılda buldı. Ul waqıtta üzeneñ matur cırları belän xalıqnı Azat Xösäyen-Timerşäyex söendergän ide. Yıraq töbäklärdä konsertlar oyıştırıp yörüçe Rişat Yosıypov alıp kilgän ide anı. Bıyıl may ayında Ural artı şähärläre buylap säyäxät qılğan häm Kamçatqağa qädär barıp citkän ber törkem artistlar da Omskinı çitlätep üttelär. Ğomumän artistlarğa yıraq şähärlärgä gastrol'lärgä yörü otışlı tügel di Rişat Yosıypov.

Şulay da äle qayber artistlar, bigräk tä yäşlär, siräk bulsa da yıraq töbäklärgä dä çığalar. Noyäber axırında Rişat Yosıypov cıyğan törkem may ayındağı marşrutın qabatlarğa niätli.

Yaz köne tuqtalmağan bulsa da közge säyäxäten bu törkem Omskidan başlarğa niätli. Konsertlarnı oyıştıruçı Rişat Yosıypov küptän tügel Omskida bulıp, kileşülär tözep kitte. Şähärneñ tatar aktivistları inde konsertnı oyıştıru xästärenä kereştelär.

Rozaliä Sayganova, Omski.

XS
SM
MD
LG