Accessibility links

дүшәмбе, 5 декабрь 2016, Казан вакыты 19:36

Tatarstannıñ iminlek oyışmasınıñ tarmakara komissiäse narkomaniä belän köräş çaraların tikşerä


Çärşämbe könne respublikanıñ Ministrlar kabinetında tarkmakara komissiäseneñ narkotiklarğa qarşı cıyılışı ütte. Cıyılışnı alıp baruçı respublikanıñ vize-premyerı Zilә Wälievadan başqa bu çarada respublikanıñ sälämätlek saqlaw ministrı Kamil Zıyätdinov, narkotiklar xäräkäten küzätüçe federal' xezmät idäräse räise Şamil Davletgildeev, prokuror Kafil Әmirov, narkotiklarğa qarşı tarmakara komissiäseneñ räise, Çallı şähäreneñ xaqimiät başlığı urınbasarı Fäyrüzä Mostafina häm Çallınıñ prokurorı çığış yasadılar.
Bu cıyılışta Çallı şähäreneñ narkotiklarğa qarşı alıp barılğan eşlärne tikşerdelär. Bügenge köndä Çallıda ike meñgä yaqın keşe narkomaniä diagnozı belän meditsina oyışmalarında küzätüdä tora. Soñğı ike yılda şähärdä narkotik qullanu tübänäyä bara. Narkotiklar belän bäyle cinayät eşläre dä uzğan yıl belän çağıştırğanda 44%-qa tübänäygän. Çallıda narkotiklarğa qarşı tözelgän oyışmalar, küp törle çaralarnıñ mondıy uñışlarda öleşe zur. Älege oyışmalar turında cıyılışta tarmakara komissiäseneñ räise Fäyrüzä Mostafina söyläde. Mondıy oyışmalarğa “Işanıç”, “Narkotiksız şähär” fondları, “Aist” ictimaği oyışması häm başqalar kerä. Şuşı yılda Çallınıñ 36 uqu yortında uquçılarnı narkotik häm alkogol' qullanuğa tikşerdelär. Älege tikşerüne ütkän 1300 keşe arasınnan 130 bala tikşerelü öçen yäşüsmer kabinetına cibärelsä, 30 bala inde küzätügä alınğan. Häm alar arasında narkomannar tabılmağan.
Cıyılışta qaralğan mäs’älälär şähärdä yaña oyışmalar oyıştıruğa tügel, ä bulğannarnıñ eşlären yaxşırtuğa bağışlanğan. Narkomaniä belän köräşü öçen sälämätlek saqlaw ministrı tarmakara komissiäsennän 1,5mln. sum aqça soradı.
Tatarstan prokurorı narkomaniä belän köräşügä kübräk dini oyışmalarnı cälep itärgä häm respublikada narkomaniä belän köräşü täcribäse belän urtaqlaşuğa basım yasadı.
Al'bina Zäynulla, Qazan.

XS
SM
MD
LG