Accessibility links

Кайнар хәбәр

Tellärne üsterü turında 2004-2013 yıllarğa programma eşli başladı


Pänceşämbe könne “Tatmedia” agentlıysında massaküläm mäğlümat çaraları öçen “2004-2013 yıllarğa Tatarstan respublikası xalıqları tellären saqlaw, öyränü häm üsterü buyınça respublika däwlät programmasın tormışqa aşıru” buyınça matbuğat oçraşuı uzdı. TR Däwlät Şurası, Ministrlar Kabinetı, Mäğärif häm fän, Mädäniät ministrlıyklarınnan kilgän wäkillär jurnalistlarnıñ sorawlarına cawap birdelär.

Bilgele bulğança Tellär turındağı zakon 1992 yılda, programma 94 yılda qabul itelgän ide. TR Däwlät Şurasınıñ Mädäniät, fän, mäğärif häm milli mäs'älälär komitetı räise Razil Wäliev anıñ niçek eşlängäne turında söyläp uzdı. Tatarstan respublikası Tel häm ädäbiät institutı citäkçese Nurmöxämmät Xisamov älege programma tatar telenä yañaça qararğa mömkinlek birde, küp kenä çığa almıy yatqan tatarça xezmätlär dönya kürüen bilgeläp uzdı. Çönki programmada maxsus alarğa aqça qaralğan. TR Ministrlar Kabinetınıñ Tellärne üsterü bülege citäkçese Kim Miñnullin: “Şundıy bülek buluı respublikanıñ zur uñışı dip atadı.Çönki Federal' külämdä ayırım tellär belän şöğellänüçe struktura yuq. Şuña barqaydan da täcribä alıp bulmıy. 2004-2013 yılğa qabul itelgän programma, prezident imzalap 10 kön uzğaç, yäğni, 2 noyäberdä eşli başlağan. Programmada küp äyber iskesennän qalğan. Ämma östämälär, añlatmalar da bar. İkençe bülektä mäğlümatı texnologiälär buyınça añlatmalar, uqıtu-tärbiä turında bülek tiränäytelgän. Ölkännärgä tatar tele uqıtu buyınça yañalıqlar kertelgän, şulay uq programmada tatar teleneñ däräcäsen kütärü dä küzallanğan. Soñğısına kilgändä TR Mäğärif häm fän ministrı Räis Şäexlislamov tatar tele uqıtunıñ sıyfatın yaxşırtu öçen yaña buın programmalar, plannar kiräk dide. Rus balalarına tatar telen uqıtu buyınça laboratoriä eşlärgä uylıylar. “Bez professor Flyura Safiullina däresleklärennän uqıdıq. Xäzer aña kritik yaqtan qararğa kiräk”, - dide. Kiläçäktä yuğarı uqu yortları belän tatar telen uqıtu öçen elemtälären urnaştıraçaqların da äytte. Monıñ öçen ministrlıykta ayırım keşe eşliäçäk ikän. “Tatar tele belän yuğarı uqu yortına kerergä kiräk”, - dide ul. TR Mädäniät ministrı urınbasarı İlfaq İbrahimov yaña programma buyınça “Mädäni ğammäwi çaralarnı ütkärgändä Tatarstan respublikası tellären qullanu” turında nigezlämä eşläwlären äytte.

Jurnalistlar uram isemnärendä xatalar küp buluın bilgeläp uzdılar. Monıñ öçen normativ-xoquqi dokumentlar eşlänergä häm anıñ üzeneñ strukturası bulırğa tieşlegen assızıqladı citäkçelär.

Bu xaqta TR mäğärif häm fän ministrı Räis Şäexlislamov

Şundıy nadan tärcemälär bar. Böten süzne dä tatarçağa tärcemä itärgä kiräkmider. Xalıqara süzlär şulay qalsa da yarıy.

Monnan tış mäktäplärdä tatar matbuğatın yazdıru buyınça eş alıp barırğa kiräklege turında da fiker alıştılar.

Landış Xarrasova

XS
SM
MD
LG