Accessibility links

якшәмбе, 11 декабрь 2016, Казан вакыты 14:53

Yäşlär parlamentı büdjettan 150 million sum sorıy


4 noyäberdä, küptän tügel oyıştırılğan yäşlär ictimaği palatası, inde 3nçe utırışın ütkärde. Olılar parlamentı byudjet aqçasın bülgändä, yäş deputatlar da çittä qalmıy. İctimaği palata utırışında toraq programmasına byudjettan aqça alu kebek mäs’älälär qaraldı.

Prokuror «Yäşlär turında»ğı qanunğa däğwä belderä. Mäsälän, Tatarstan qanunında, respublika watandaşları turında süz bara, şul mätdä belän Prokuror kileşä almıy ikän. Yäşlär, bu alarnıñ xoquqların bozmıy dip, prokuror däğwäsenä qarşı çıqmadı. Alar, Tatarstan yäşläreneñ Rusiänekennän qala, başqa törle watandaşlığı yuq, digän cömlälär belän rizalaştı. Älege mäs’älä, Däwlät Şurasında qaralaçaq. «Yäşlär turında»ğı qanunğa ictimaği palata äğzäläre üz tözätmälären äzerlägän ide, ämma olılar parlamentında yäşlär tözätmälärenä çirat citmi. Älegä, Däwlät Şurası sessiäsendä «Yäş ğailälärne toraq belän tä’min itü» turındağı qanunğa tözätmälär genä qaralaçaq. Yäşlär, toraq tözüçe oyışmanıñ xisabın tıñlap, Tatarstan xakimiätlärennän, programma ütäleşe öçen, byudjettan 150 million sumnı bülep birüne soradılar. «Yäşlär tözeleş berläşmäse» citäkçese, xäzer tikşerelä torğan sotsial ipoteka, klassik ipoteka, häm tözeleş kooperativları yäş ğailälärgä turı kilmäyäçäk, digän belderü yasadı. Näticädä, utırışta yäş ğailälärne toraq belän tä’min itü programması bik äkren ütälsä dä, ä Qazanda anıñ öçen bötenläy aqça bülenmäçädä, programmağa teläktäşlek kürsätergä kileşelde.

Yäşlär palatasınıñ oyıştırulı belän ruxlanıp, Bawlı mäktäp balaları üz fikeren belderergä teläp, yäşlärgä qağılışlı qanunnarğa üz tözätmälären äzerlägän bulğan. Alar belän Bawlı wäkile Sädretdiov İlyas tanıştırdı. Anıñ äytüençä, awıl balaları belem alu öçen, yäş ğailägä öygä cihaz alğanda protsentsız kredit birelüen teli, alar, oyışmalar aldında yäşlärne eşkä alu burıçın quu turındağı matdälär yaqlı.

Yäşlär palatası yegetlär häm qızlarnıñ fikeren işetterü öçen oyıştırılğan bulsa da, alarğa kübräk olılar süzen tıñlarğa turı kilä. İctimaği palata utırışında olılar parlamentı deputatı Dmitriy Ftorov çığış yasap, byudjetnı bülgändä nindi bäxäslär barğanın häm küpçelek tözätmälärneñ kire qağıluın añlattı. Ämma yäşlär barıber ömetlären özmi, yıl buyına rayonnarda törle çaralar ütkärep, konferensiälär oyıştırıp, säyäsät mäktäben buldırıp wazğiätne yaxşı yaqqan üzgärtergä teli.

Bikä Timerova.

XS
SM
MD
LG