Accessibility links

якшәмбе, 4 декабрь 2016, Казан вакыты 13:23

Qazanda Qazan İzge Ana ikonası bäyräme.


4 noyäberdä Qazan İzge Ana ikonası bäyräme könendä Böten Rusiä Patriarxı Aleksey ikençe Qazan şähäre administratsiäse başlığı Kamil' İsxakovqa Patriarxnıñ “Urıs Pravoslav çirkäwe danı öçen tırış xezmätläre öçen fatixalaw” digän gramota tapşırdı. Bu maqtaw kägäze Kamil' İsxakovqa Qazan İzge Ana ikonasın Vatikannan Rusiägä qaytaruda quyğan xezmätläre öçen birelde. Ä 4 noyabbr'dä Qazanda pravoslavlar Mäskäwneñ häm Rusiäneñ 1612 yılda polyaklardan qotılularına bağışlanğan çaralar ütkärdelär. Bäyrämgä qarşı töndä Qazan İzge Ana ikonasınıñ Arça qırı ziratındağı çirkäwdä saqlanğan küçermäsen Petr Pawel soborına küçerü ütkärelde. İrtägesen anda tantanalı liturgiä ütkärelde. Ä tatar kongressında Qazan şähäre administratsiäse “Qazan İzge Ana ikonası”: izge säyäxät häm perespektivalar” digän tügäräk östäl ütkärde. Başta tarixçılar häm arxeologlar İzge Ana ikonasınıñ cirgä iñüe häm yuğaluı tarixın söylädelär. Tarixçı Georgiy Myuller üzeneñ fänni dokladında Qazan İzge Ana ikonası monnan 100 yıl elek häläk bulğan digän fiker äytte. Ä tarixçı Fayaz Xucin ikona päydä bulğan urında, Qazan Kirmäne tiräsendäge Bogoroditsa monastıyrendä ütkärelgän qazılmalar, анда16 ğasır urtalarında salınğan çirkäw qaldıqları da, şulay uq, Qazan xanlığı çorına turı kilgän tabıldıqlar da bluın belderde. Bu cirlär keşe söyakläre belän qaplanğan ikän. Qazan administratsiäse wäkilläre 2000 yıldan başlanğan Vatikannan Qazan İzge Ana ikonasın qaytaru eşläreneñ tarixın söylädelär. Alar qatnaşında ütkärelgän ekspertizanıñ Vatikanda saqlanğan Qazan İzge Ana ikonasınnan küçerep yasalğan iñ borıñğı nöxsä ikänen raslawın belderdelär. Alar fikerençä ikona Qazanğa qaytarılırğa tieş. İnde Qazan Kirmäne astında ikonanı urnaştıru öçen bik zur izge säyäxät üzäge proektı da äzer ikän. Tügäräk östälne alıp baruçılar- Qazan administratsiäse başlığınıñ din häm mädäniät mäs’äläläre kiñäşçese Dmitriy Xafizov häm Qazan Yeparxiäse idaräseneñ särqatibe Aleksandr Pavlov tügäräk östälneñ rezolyutsiäsen täqdim ittelär. Yäğni rezolyutsiä Qazan İzge Ana ikonasın Qazanğa qaytarıp, aña tabınu öçen ğomum Rusiä külämendä izge säyäxät üzäge tözü yağında. Älege rezolyutsiä belän barlıq tügäräk östälgä çaqırılğannar da kileşmäde. Tatarstan Diniä nazäräte wäkile Wäliulla xäzrät tawış birüdän tıyılıp qaldı. Ä tügäräk östälgä çaqırılmıy kilgän BTİÜ citäkçeläre rezolyutsiägä qarşı çıqtılar.Yunıs Ätnäle.

XS
SM
MD
LG