Accessibility links

дүшәмбе, 5 декабрь 2016, Казан вакыты 11:44

6 Noyäber – Tatarstan Konstitutsiäse köne


Tatarstan bu könnärdä bäyrämnär, yallarnı kötep yäşi disäñ dä bula. Çönki aldağı 4 kön – 6 noyäberdän başlap 9na qädär tatarstanlılar yal itäçäk. Respublikada 6 noyäberdä respublika Konstitutsiäse könen bilgeläp ütäçäklär, ä 7 – böten Rusiä belän bergäläp Tatulaşu könen bäyräm itäçäkbez. Bu ike bäyräm dä yallarğa turı kilü säbäple, tatarstanlılar düşämbe häm sişämbedä dä yal itäçäk. Şulay itep, Rusiä Duması deputatları 7 noyäber bäyrämen beterep, anı 4 noyäber – Rusiäne polyak ğäskärlärennän yaqlap qalu istälegenä bağışlanğan bäyrämgä äyländerergä niätlänep yörgändä, tatarstanlılar älegä iskeçä yal itärgä äzerlänä. Ozaqqa suzılğan yal könnären bezdä yaratsalar da, yış qına alar nindi bäyräm yäki data xörmätenä bulğanına ällä ni iğtibar itmilär.

Läkin bäyrämnär uñayınnan respublikada bötenläy eşlär tuqtalıp qaldı, dip äytep bulmıy. Respublikanıñ Ministrlar kabinetında sotsial’ häm xezmätara mönäsäbätlärne kileşterü buyınça oyıştırılğan 3 yaqlı komissiäneñ utırışı uzdı. Vitse-premyer Zilä Wälieva citäkçelegendä ütkän bu cıyılışta Tatarstan xökümäte, profsoyuzlar, respublikanıñ Säwdä-sänäğät palatası wäkilläre arasındağı kileşü xaqında süz barğan. Qazanda 3 kön däwam itkän İstälek burıçı dip isemlängän Xäyriä çarası tämamlandı. Anda İdel buyı okrugınnan Tönyaq Kavkazda wafat bulğan Eçke eşlär ministrlığı wäkilläreneñ 100gä yaqın ğailä äğzası qatnaştı. Tatarstanğa İndiä räsmi delegatsiäseneñ säfäre tämamlandı. Anıñ eşçänlegeneñ berençe näticäse bulıp respublikada çäy tutıru buyınça TC Company LTD şirkäte oyıştıru turında xäbär ite Säwdä ministrlığı.

Qazan däwlät universitetında älege uqu yortınıñ 200 yıllıq yubileyına bağışlanğan çaralar başlanıp kitte. 5 noyäber könne anda iqtisat fakul’tetınıñ tantanalı utırışı uzdı. Başqalanıñ meñyıllığına äzerlek tä bäyrämnärgä qarap tuqtap tormıy. Şähär uramnarında tözekländerü eşlär qış yaqınayu belän qızulana ğına bara kebek. Oyıştıru eşläre xaqında fikerläşülär dä däwam itä. Comğa könne Ğabdulla Tuqay muzeyında Qazannıñ yubileyına bağışlanğan Tügäräk östäl utırışı uzdı.

Gölnaz İlgizär

XS
SM
MD
LG