Accessibility links

җомга, 9 декабрь 2016, Казан вакыты 05:08

Tatnet: Prezidentqa internet aşa niçek xat yazarğa?


İnternetnıñ tormışıbızğa ütep kerüe belän, dönya ber global awılğa äylände, digän fikerdä tora belgeçlär. Aralarnı yaqınaytu, dönya belän ber sulışta yäşäw eşendä tatar häm başqortlar da qatnaşa. Törle il, şähär, üzgä ber şartlarda yäşäwçe millättäşlär bu atnada, Amerika Prezidentı saylawları xaqında fiker alıştı. Mäsälän, «Tatarskaya gazeta» digän internet säxifäneñ konferensiä bülegendä Almaniädä yäşäwçe Aliä xanım, Amerika Prezidentı saylawları näticälärenä qarata fiker belderüne soradı. Ramazan isemle forumçı, Buşnıñ ikençe tapqır saylanuı dönyada demokratiäneñ kimep, dönyanıñ artqa tägäräwen kürsätä, digän bäyä birde. Amerikada yäşäwçe forumçı, Sabircan äfände, üzeneñ demokratlar öçen tawış birüen xäbär itte, häm yaña saylanğan Prezident mädäniätlär qarşılığına kitermäs mikän, dip möselmannar öçen borçıluın añlattı. Azat Bädretdin, mäsälän, Buş häm Kärri arasında ayırma zur tügel, fikeren belderde. Mäskäwdä yäşäwçe İlyas xan Astraxanskiy, min Amerikada yäşäsäm, respublikan firqä öçen tawış birer idem, digän cömlälär yazıp qaldırğan. Başqa forumçılar, bu yazunı kürep, ğäcäplänü belderdelär, häm anıñ niqädär yalğışqanın añlatırğa tırıştılar.

Tatforum.at.tt säxifäsendä Amerika Prezidentı saylawlarına bitaraf qaldır, anda kübesençä, Qazanda nigä tatarça söyläşmilär, tatar balaları urıslaşa, Qazanda da tatarlar üzlären çit keşelär itep toyalar, digän ruxtağı yazular urın aldı. Ägär sez dä bu söyläşülärdä qatnaşırğa telisez ikän, adreslarnı qabatlıym, «Tatarskaya gazeta»nıñ konferensiäsen ezlätü programmaları aşa tabıp bula, ä tatforum säxifäseneñ adresı ğadi – tatforum.at.tt.

Äğär sez üz fikeregezne, borçığan problemağıznı internetta utıruçı tatarlarğa ğına tügel, ä xakimiät oyışmalarına da citkerergä telisez ikän, internet anıñ öçen kiñ mömkinlek birä. Mäsälän, här Tatarstan ministrlığınıñ diärlek internetta üz säxifäse bar, web-bite bulmasa, räsmi saytlarda xatlar yazu öçen elektron poçta adresları kürsätelgän. Ägär sez Tatarstan Prezidentına möräcäğät itärgä telisez ikän, anıñ öçen Tatarstan räsmi säxifäsen tabıp, ä ul www.tatar.ru adresında urnaşqan, Prezident bülegenä küçegez. Anda xat yazu öçen maxsus bülek bar, ul «grajdannar qabul itü» dip atala, anda urısça häm tatarça xat yazu tärtibe birelgän. Şuşında uq, isem-familäne quyıp, maxsus täräzädä üteneçegezne yazıp cibärä alasız. Ul, xat räweşendä ,Tatarstan Prezidentı idärseneñ xatlar bülegenä baraçaq. Başqa säxifälär dä, şundıy uq, prinsip belän eşli. Mäsälän, xökümät citäkçesenä yazarğa teläsägez kabmin.tatar.ru adresında urnaşqan internet säxifäsenä kerep, «internet-qabul itü» digän bülektä ğözeregezne yazıp qaldıra alasız. Läkin biredä mäğlümat urıs telendä genä birelgän. Şuşı uq, kabmin.tatar.ru säxifäsendä, xökümät räiseneñ urınbasarlarına da xat yazu mömkinlege tudırılğan. Säxifädä 4 urınbasarnıñ da, elektron poçta adresları kürsätelgän. Adresnı qabatlıym : kabmin.tatar.ru.

Ägär Däwlät Şurası citäkçese, deputatlarğa möräcäğät itärgä teläsägez, www.gossov.tatarstan.ru saytına kerep, kontaktlar bülegen açsağız, yazu cibärü öçen maxsus täräzä açılır. Tatarstan Yuğarı mäxkämäsendä eşegez kilep çıqsa, www.tatsud.ru digän säxifägä kerergä bula. Anda xat yazu öçen elektron adreslar kürsätelmäsä dä, Mäxkämä bülekläreneñ telefonnarı birelgän, qaysı könne nindi eşneñ qaraluı häm xökem qararları belän tanışu mömkinlege tudırılğan. Eçke eşlär ministrlığınıñ internettağı adresı - www.mvdrt.ru, anda da elektron xat yazu öçen mäğlümat tabıp bula. Rusiä Pensiä fondınıñ Tatarstan bülegen www.pfrrt.ru digän säxifädä tabıp bula. Älege säxifädä soraw-cawap bülegen ezlärgä kiräk.

Tatarstan cirendä eşläwçe federal ministrlıqlarğa çığu yulların www.federal16.ru digän sayt birä. Bu federal inspektornıñ säxifäse bulıp ta tora. Tatarstannıñ 16 region ikänen belep, adresnı istä qaldırırğa ciñel bula –www.federal16.ru Ä barlıq xakimiät oyımalarnıñ säxifälärne tabu öçen iñ ansat yul - alarnı www.tatar.ru saytında, «internet» digän bülektä äzlänü.



Bikä Timerova.

XS
SM
MD
LG