Accessibility links

җомга, 9 декабрь 2016, Казан вакыты 07:01

Ğiraqta 60 köngä ğädättän tış wäzğiät iğlan itelde


Bügen AQŞ xärbi hawa köçläre häm artilleriäse Fällücä şähären bombalawnı däwam itte. Xäbärçelär äytüençä, bügenge bolmalawlar kiçägesennän dä qatıraq bulğan. 6 ay elek Fällücä çolğanışı başlanğannan birle bu qädär qatı bombalaw bulğanı yuq ide ale dielä. AQŞ citäkçelegendäge köçlär xäzer Fällücäne yawlarğa äzerlänä. AQŞ xärbilär äytüençä, ğisyançılar urnaşqan bu şähär tiräsendä xäzer 10 meñlek ğäskär tuplanğan. Alarnıñ küpçelege amerikannar. Beraz Ğiraq xärbiläre dä bar. Oçuçısız amerikan küzläw oçqıçı bügen Fällücä östennän oçıp bombalawlar näticäläre turında mäğlümät tupladı. Fällücä xalqı äytüençä, bügen irtän şähärneñ könçığışında atışlar bulğan. raketaatqıçlar häm minaatqıçlar belän qorallanğan ğisyançılarğa amerikan xärbiläre tanklar häm awır utlı qorallar belän höcüm itkän Şahitlär ber Amerikan BTRınıñ yanuın kürüläre turında äytä. AQŞ xärbiläre bu bäreleş turında älegä berni dä äytmäde. Älegä AQŞ häm Ğiraq köçläreneñ Fällücädäge ğisyançılarğa qarşı küptän kötelgän kiñküläm höcüm başlawı kürenmi. Ämma AQŞ xärbilärenä yaqın qayber xäbärçelär äytüençä, kiñküläm höcümneñ berençe öleşe başlanğanğa oxşıy. Höcümneñ bu öleşeneñ maqsatı şähärgä cir öste ğäskärläre kerer aldınnan ğisyançılarnıñ tä''minäten kisü häm mäğlüm saqlanu pozitsiälären yuq itü. Waşingtonda AQŞ däwlät departamentı süzçese Richard Boucher Fällücägä häm ğisyançılar qulındağı başqa şähärlärgä höcümnär yaqın arada başlanırğa mömkin dide.

AUDİO: Fällücädä wäzğiät qıyın häm totrıqsız bulıp qala birä. Fällücädä häm başqa şähärlärdä tınıçlıq urnaştıru Ğiraq xökümäte öçen dä bezneñ öçen dä bik möhim, häm anda yäşäwçe keşelär xaqına monı tiz arada eşläw kiräk. Anda yäşäwçe, säyäsi protsessta qatnaşu mömkinlgenä layıqlı, saylawlarda qatnaşu mömkinlegenä layıqlı, Ğiraqnıñ kiläçägendä qatnaşırğa layıqlı häm terrorçılar, üterüçelär qulında totıq bulmasqa tieşle keşelär xaqına.

Fällücägä yäki başqa berär şähärgä höcüm başlaw öçen Ğiraq waqıtlı premyer ministr Ayät Älläwidän färman buluı zarur. Alläwi bügen Bar Ğiraqnıñ kördlär qaramağındağı öleşennän qala barlıq cirlärendä dä 60 köndä ğädättän tış wäzğiät iğlan itte. Bu köç qullanularnıñ häm üterülärneñ arta baruı belän añlatıldı. Ul arada ğisyançılar ğiraq politsiäsenä qarşı yaña höcümnär başlap cibärde. Bu çolğanıştağı Fällücägä basımnı kimetü tırışlığı bulırğa oxşağan dielä. Uzğan töndä ilneñ könbatışındağı Anbar wilayätendä ğisyanıçlar berniçä politsiä stansiäsenä granataatqıçlar häm minaatqıçlar belän höcüm itte. Ğiraq politsiäseneñ yuğarı citäkçese äytüençä, Hadita häm Halania şähärläre yanında ğisyançılar politsiä stansiälärenä bärep kerep anda 21 politsiä xezmätkären cäzalap ütergän. Könbatış Ğiraqtağı bu soñğı bäreleşlär küplärne İordaniägä kitärgä mäcbür itte. İordaniä räsmiläre äytüençä, 2003-neñ martında suğış başlanğannan birle alarğa ğiraqtan bu qädär küp keşeneñ kilgäne bulmağan. İordaniä çik saqçıları soñğı 4 köndä Ğiraqnıñ könbatışınnan bezgä 7 meñ keşe kerde di. Bu yıl başındaraq Fällücädä 300 meñläp keşe yäşägän bulsa, soñğı 6 ayda alarnıñ 250 meñe şähärdän kitte dielä. Süriä Ğiraq belän üze arasında çik aşa ütü mömkinlelären tomalaw eşe alıp bara. Bu eş AQŞ citäkçelegendäge koalitsiä belän söyläşülärdän soñ başlandı. Elegräk AQŞ Süriäne islam suğışçılarına Ğiraqqa ütep kerü mömkinlege birüdä ğäyeplägän ide. Süriä bu ğäyepläwlärne kire qağa.

Naif Aqmal, Praga.
XS
SM
MD
LG