Accessibility links

дүшәмбе, 5 декабрь 2016, Казан вакыты 01:30

Başqortstanda yäşäwçe tatarlarğa ezärlekläwdän xoquqi yärdäm kiräk


Tatarstanda Başqortstannan küçep kilep yäşäwçe mädäniät häm sänğät ähelläre küp kenä. Alar Başqortstandağı tatar-başqort sänğät tormışı turında qızıqsınıp toralar. Ufada Vener Mostafinnıñ faciğäle wafatın bik borçılıp, yöräkläre aşa qabul ittelär. Bu qayğılı xäbärne urtaqlaşqan cämäğät eşlekläre, cırçılar, kompozitorlar häm ğomumän mädäniät, sänğät ähelläre bixisap. Çın icat keşeläre ikännären Tatarstanğa kilep üzlären tanıtqan sänğät'kärlär arasında Zilä Söngätullina, Salawat Fätxetdinov, Xäniä Färxi, Ayrat Arslanov, Xämdünä Timerğaliewa, Röstäm Malikov, Näfqat Niğmatullin häm başqa bik küp, bik küplär bar. Başqortstannan kitärgä mäcbür bulğan tatar millätle yazuçılarnı , şağirlärne sanap qına betererlek tügel. Ä Başqortstanda yäşäp,tatar mäğärifen üsterügä ğömeren bağışlağan Nurmöxämät Xösäenovnı ezärlekläwlär däwam itä. Tatarstanda yäşäwçe ber yäş sänğät'kär Azatlıq radiosınıñ Qazan studiäsenä üzeneñ Başqortstannan qunaqqa kilgän änisen alıp kilde. Alar üzläreneñ isemnären äytmäwne ütendelär. Ä xaqiqät'ne alar yäşermädelär. “ Başqortstanda prezident saylawlarınnan soñ tatar xalqı niçek yäşi digän sorawğa, ul :“ Başqortstanda tatar xalqınıñ xoquqları yuq disäk tä bula . Başqortstan prezidentı saylaw waqıtında ikençe turğa çıqqaç äytkän ide :“Tatar telenä däwlät tele statusı biräm”,- dip. Sawlawdan soñ 11 ay bara , ä birü turında süz kuzğatuçı da yuq. Saylawda qatnaşqan oppozitsiädägelär kübese eşsezlär, alarnıñ ğailäläre dä eşkä urnaşa almıylar.Çönki alar prezidentqa qarşı çıqqannar ide. Demokratiä,- digän süz bezdä bötenläy yuq.Eştän çığarılğan keşelärgä törleçä qurqıtular belän, ğailägezne,balalarığıznı tarqatabız digän yanawlar belän öylärenä telefonğa şıltıratalar. Şul säbäple küp keşelär kiçlären öydän çığarğa qurqalar xäzer,”- dide ul xanım. Menä şundıy ezärlekläwlär qayberlärne küçep kitärgä, ä qayberlärne faciğäle adımğa mäcbür itä. Alarğa xoquqi tayanıç häm yärdäm kiräk.

Mälikä Basıyr.

XS
SM
MD
LG