Accessibility links

Кайнар хәбәр

Kamal teatrında "Telsez küke" premyerası


“Telsez küke” spektakle başlanıp kitkäç, anıñ berençe öleşeneñ baytaq waqıtı rus telendä bara. Çönki spektakl'neñ syujetına uzğan ğasırnıñ 40 yıllarında barğan SSSR belän Karelo-finnar suğışı çorı alınğan. Bu suğış waqıtında törle millät keşeläre arasında ikese ike yaqta suğışqan tatar keşeläre ber bersen cır aşa tanıylar. Fin suğışı waqıtı äle berqayçan da teatr säxnäsendä çağıldırılğanı yuq. Spektakl'neñ üzençälege şunda. Monda geroylar,personajlar, tatarça da, finça da, rusça da söyläşälär. Ämma urtaq tel cır häm milli berdämlek xisläre , ikese ike yaqta suğışqan soldatlarnı qoralsızlandıra. Xalıqlar öçen bik möhim bulğan Tel häm Moñ mäs’äläse spektakl' küreneşendä yarılıp yata . Uzğan ğasırlarda uq torğan cirlärennän kitkän tatar keşeläre Finlyandiädä yäşäsä dä, üzläreneñ tellären ğöref-ğadätlären saqlawları belän , üz tuğan tellären balalarına onıqlarına tükmi-çäçmi citkerälär. Bu p'yesanı säxnäläştergän Ğ.Kamal teatrınıñ baş rejisserı Färit Bikçäntäev menä närsä dide:“Tatarnı berläşterä torğan ike närsä bar, ul- cır häm tel. İñ töp fiker şul”- dide ul. Bu spektakl'gä muzıkanı Başqortstanda yäşäwçe kompozitor Rim Xäsänov yazğan. Süz aña.“Başqortstanğa kirägem çıqmağanda, anda eş bulmağaç, anda kirägem çıqmağan çaqta, başqa cirdä kirägem bar ikän. Menä oşbu Qamal teatrı mine ezläp taptı. Häm menä bıyıl inde ike spektakl'gä muzıka yazam . Dimäk,Tatarstanğa minem kirägem bar. Min bik räxmätle Färit Bikçäntäevkä häm Şamil' Zinnurovqa mine çaqırğan öçen. ”,- dide ul. Sezneñ iğtibarığızğa p'yesanıñ avtorı Zölfät Xäkim fikerläre“P'yesanı maxsus ike teldä yazdım.Tatarça häm rusça. Ber teldä genä bulsa , Karel urmannarında rus soldatları arasında ike tatarnıñ ber bersenä endäşüeneñ effektı bulmas ide.Bez monıñ turında bik küp uylaştıq häm tamaşaçı monı añlap qabul itär dip uylıybız”,- dide ul. Kamal teatrı direktorı Şamil' Zakirov fikere: “Bu temanıñ ideyäsı inde 1995 yılda uq tuğan ide. Bezneñ teatrıbızğa layıq spektakl' bu. Bu bezgä kisätä, millätebez belän, ilebez belän telsez qaluıbız ixtimal, dip” –dide ul. Ä menä tatar yäşüsmerlär teatrı direktorı Robert Mortazin fikere , “Bu temağa bağışlanğan , bu temanı yaqtırtqan , naxaqqa törmä faciğälärenä eläkkän keşelär turında quyılğan spektakl' äle yuq ide”,-dide ul. P'yesanı saylağanda jyuri räise bulğan professor Roza Usmanova fikere: “Xalıqqa bilgele bulmağan äyberlärne açıp sala bu spektakl'”,- dide.Akter Rämil Töxvätullin fikere “Bu spektakl' suğış turında ğına tügel.Milli ğorurlıq, milli ideya xisläre belän bäylängän spektakl' bu ”,-dide ul. Bu waqiğalarda üzläre qatnaşqan, yäki işetep belgännär küp bulmasa da, ölkän buın keşeläre bu çorlarnı yaxşı xäterlilär. Artistqa Roza Xäyretdinova fikere “Bez fin suğışı waqıtlarında bala-çağa ğına bulsaq ta, bik xäterlibez ul çorlarnı .Artistlarnıñ uynawları da çın küñellärennän, iskitkeç yaxşı”,-dide. “Telsez küke” suğış turında , häm millät turında . Tel häm cır keşelärneñ tuğanlığın saqlıy, qorallarnı , doşmanlıqnı yuqqa çığara. Yaña spektakl'dä menä şundıy fiker yata.

Mälikä Basıyr Qazan.

XS
SM
MD
LG