Accessibility links

җомга, 9 декабрь 2016, Казан вакыты 13:04

Tolyattida mäçetkä birelgän cirne tartıp alğannar


Mäskäwdä “Bäysez matbuğat üzäge” “Bu yul xramğa iltmi” digän isem astında “Tolyattida kiñ külämdä möselmannarınıñ xoquqları bozıla” digän temağa matbuğat oçraşuı ütkärde. Bu matbuğat konferensiäsendä äle ber ay elek kenä barlıqqa kilgän “Xaq - Spravedlivost” dip atalğan, möselmannarnıñ xoquqın yaqlawçı oyışmanıñ yuğarı şurası räise , Rusiä prezidentı qarşındağı keşe xoquqları komissiäse ägzäse fälsäfi fännär doktorı Kamilcan Kalandarov, “Xaq” oyışmasınıñ tağı ber äğzäse professor Sergey Komkov, Tönyak Kavkaz möselmannarınıñ koordinatsion üzäge räise urınbasarı Şafig Pşixaçev häm äytep ütelgän oyışma yuristı Patimat Xäkimova qatnaştı. Matbuğat konferensiäsendä qatnaşuçılar bügenge köndä Tolyatti şähärendä mäçet tözeleşenä birelgän cirne şähär xakimiäte kire aluı turında xäbär itte. Cir 98 yılda uq birelgän bulsa da, bu cirne qullanuğa kileşü barı tik 10 ayğa ğına tözelgän bulğan. Şul uq waqıtta kileşülärdä mäçet tözeleşe kürsätelmägän barı tik anıñ nigeze genä salınırğa tieş dielgän bulğan. Şähär xakimiäte, kileşü gä waqıt ütte, läkin ul cirenä citkerelmäde dip, möselman oyışmasına xäbär dä birmi torıp,. bu cirne kire qaytaru turında qarar çığarğan. Bu xaqta Kamiljan Kalandarov, mondıy xällär Rusiäneñ bar töbäklärenä dä xas. Mäçet tözeleşenä cir alu bik zur awırlıqlar belän bara.- dide.

Bu nizağnıñ barlıq dokumentları belän tanışqan, xäzer inde eşne arbitraj mäxkämägä kiterep citkergän “Xaq “oyışması yuristı Patimat Xäkimova oçraşu säbäben açıqlap, eşneñ barışına yuridik bäyä birde. Häm nizağnı xäl itär öçen dokumentlarnı Arbitraj mäxkämägä biräçägen belderde.Ä inde professor Sergey Komkov Rusiädäge millätara, dinara vazgiätkä ğomum näticä çığarıp, bügenge köndä Rusiä darı tutırılğan miçkäne xäterlätä. Ul şartlar öçen ber oçqın da citä dide. İdel buyındağı xällärne Tönyak Kavkaz belän çağıştırdı.

Ğomumän alğanda matbuğat oçraşuında qatnaşqan jurnalistlar bu oçraşunıñ teması belän kileşmäwlären belderdelär. Çönki monda qarşılıq şähär administratsiäse möselman oyışması arasında bara. Monı hiç kenä dä kiñ külämdä möselmannarnıñ xoquqları bozılu dip qararğa yaramıy digän sözemtä çığardılar.

Matbuğat oçraşuınnan soñ min "Xaq" oyışması yuğarı şurası räise Kamilcan Kalandarovka bu xoquq yaqlawçı yaña oyışma turında söyläwen ütenep, berniçä soraw belän möräcäğät item. Kamilcan Kalancarov bezneñ oyışma möselman xalıqlarınıñ ğına tügel. Başqa xalıqlarnıñ xoquqların yaqlayaçaq, bezneñ oyışmada törle millät wäkilläre bar. Häm, bez törle dinnärneñ wäkillären dä üzebezneñ oyışmağa kerttek dide. Häm bu oyışmağa Yevropa şurasınıñ da, Xoquq yaqlawçı institutnıñ da iğtibarı zur buluın belderde. Min möselmannarnıñ xoquqın yaqlarğa kiräk digän mäsälä turında Rusiä prezidentı Vladimir Putin belän dä oçraştım. Ul bezgä teläktäşlek belderde. Bezneñ oyışmada 15 xoquq professorı eşli. Bez ictimaği oyışma bulsaq ta, bezneñ fiker işeteler dip uylıybız dide. Bez Rusiä külämendä qayda xoquq bozılu turında monitoringlar ütkäräbez, fänni xezmätlär yazabız. Bezneñ eşne xalıq qına añlasın ide. Çönki bez alar öçen eşlibez dide Kamilcan Kalamdarov.

Näzifä Kärimova, Mäskäw

XS
SM
MD
LG