Accessibility links

сишәмбе, 6 декабрь 2016, Казан вакыты 15:10

Fälästin citäkçelegendä Arafat urının kem alır?


Fälästin citäkçese Yäsir Arafatnıñ sälämätlege turında yaña qarşılıqlı xäbärlär kilä, xörmätle tıñlawçılar. Anıñ bik awır xäldä, tirän märttä buluın xäzer inde yuğarı fälästin citäkçelege dä tanıy. Çärşämbedä fälästin çirlärendäge ölkän ruxanilärneñ berse Taysir Dawıt Tamimi Arafat yanında bulıp, anıñ xäle bik qatlawlı, ämma ul äle isän dip belderde. Xäzer inde iğtibar torğan sayın fälästin citäkçelegeneñ kem qulına küçüenä borıla.

Şulay itep, sişämbe könne kürengän şomlı xäbärlärgä qaramastan Yäsir Arafatnıñ älegä isän buluı xaqında belderelä, ämma berük waqıtta anıñ cenazasına äzerlänü dä alıp barıla. Çärşämbedä mäğlüm fälästin räsmie Säyib Erekat bu uñaydan bolay dide:

Audio, Säyib Erekat

"Räisneñ wafatı oçrağında anı Ramallahdağı Moqata mäxälläsendä cirläw xaqında qarar qılındı, bezneñ Mısır qärdäşlärebez isä Arafatnı Qahirädä cirläwne täqdim itte" di yuğarı fälästin wäkile Erekat. Arafatnı qayda cirläw mäs''äläse, başta şaqtıy qatlawlı kürensä dä, xäl itelep kilä şulay itep, ä menä anı xakimiattä kem almaştıraçaq, monısı alay uq açıq tügel. Citäkçelekkä kemneñ kilüe ber fälästinlelär tormışına ğına tügel, ä bar Yaqın Könçığıştağı solıx protsessına zur yoğıntı yasayaçağı kön kebek açıq. Xäle naçarayu belän Arafatnıñ qayber wazifaları inde öleşçä fälästin premyerı Äxmät Qıray häm bu urında elek eşlägän Mäxmüt Abbas arasında bülengän ide. Çärşämbedä fälästin citäkçelege, Arafat wafat bulğan oçraqta fälästin üzidaräseneñ başlığı itep parlament citäkçese Räwhi Fattahnıñ iğlan iteläçäge xaqında kileşte. Şunnan soñ, qanunda qaralğança, 60 kön eçendä xakimiatneñ yaña räisen saylaw ütkärelergä tieş bulaçaq. Arafat üzennän soñ citäkçelekne kemgä tapşırırğa cıyınuı xaqında belderülär yasamağan ide. Mömkin däğwaçılar bulıp inde telgä alınğan premyer-ministr Äxmät Qıray häm elekke premyer Mäxmüt Abbas çığa ala. Hayfa universitetında säyäsi fännär uqıtqan häm fälästin tikşerenülären alıp barğan İlan Pappe süzlärençä,

Audio, İlan Pappe

"Şuşı ike şäxes hiç yuğı başlanğıç çorda, Mäxmüt Abbas Arafat urınına kilep, ä Qıray beraz kiñäytelgän premyer wazifaların ütäp elekke pozitsiäne saqlap qala ala. Alarnıñ saylawlardan soñğı berençel çorda xakimiat üzägendä buluın küz aldına kiterü bik urınlı" di İlan Pappe. Şunısı da iğtibarğa layıq - şuşı ike fälästin säyäsätçese İzrail öçen dä uñay nämzät bulıp tora. Ämma näq menä şul säbäple alarnıñ fälästinlelär arasındağı yaqlawı tübän bulaçaq digän farazlar bar. Könbatış yar häm Gazadağı radikallar öçen alar ikese satlıq häm Qıraynıñ da, Abbasnıñ da alarğa tä''sire yuq däräcäsendä. Yaqın Könçığış belgeçe Gerd Nonneman, Qıray häm Abbas İzrail wä Amerika tarafınnan yaratıla ala, läkin uramdağı fälästinlelärdän alar berqayçan da ixlas yaqlaw qazanmayaçaq dip isäpli.

Audio, Gerd Nonenman

"Alar ikese bik ciñel genä satlıqcan bularaq sızılıp taşlana ala. Radikal'' törkemnär belän kileşüçe Abbas ta, Qıray da tügel ide, ul Märwän Barğudi buldı" di Nonneman. Märwan Barğudi elek Könbatış Yarda Arafatnıñ Fatah oyışmasın citäkli ide, ul çınnan da bik abruylı fälästin wäkile, läkin xäzerge waqıtta ul İzrail törmäsendä utıra.

Kärim Kamal
XS
SM
MD
LG