Accessibility links

сишәмбе, 6 декабрь 2016, Казан вакыты 11:16

Tatarstan deputatları 2005 yılğa byudjetnı tikşerde


Pänceşämbe könne Däwlät Sovetınıñ çirattağı plenar utırışında respublikanıñ kiläse yılğa byudjet turındağı qanun häm başqa mäs'älälär qaraldı. Kiläse yıldağı keremnär häm çığımnar arasında tiskäre ayırma bar. Küp aqça sorıy torğan sotsial' tüläwlär torğan sayın respublika cilkäsenä salına, salımnıñ ciñel tuplana torğanı Mäskäwgä kitä, ä töbäklär qaramağında — yaxşılap cıyıp bulmıy torğanı ğına. Citmäsä, neft' tapqan öçen tülänä torğan aqçalar bıyıl tağı da arttı. Şulay da, deputatlar cıyılası aqçanı bäxäsläşä-bäxäsläşä büldelär.

Kiläse yıldağı fatir bäyäläre artu, taşlamalarnıñ beterelüenä qarata ğadi xalıq uñay mönäsäbät beldermi. Fäqirräk keşelärgä häm qayber sotsial' qatlamnarğa yärdäm kürsätü programması tözelä. Ämma bu yärdämneñ kemgä, küpme kilüen töşenüçelär bik az. Älege mäs'älä xökümät äğzäläre häm şähär başlıqları qatnaşlığındağı kiñäşmädä tikşerde.

Möstäqillek kimü, üzäkneñ qulı qatılanuı menä şundıy ağımdağı eşlärdä sizelä. Läkin mondıy şöreplärne qatırunıñ da çige bar. Töbäklärneñ citäkçelären Rusiä prezidentı täqdime buyınça saylamağan öçen cire parlamentlarnı quıp taratuğa qarşılıq köçäyä. Tatarstan prezidentı Mintimer Şäymiev töbäklärneñ qanun çığaru orğannarın quıp taratu täqdime Rusiä Konstitutsiäsenä qarşı kilä, dip belderde İnterfaks-Povolj'ye agentlığına birgän äñgämäsendä. Ul Rusiä Konstitutsiäseneñ 85 matdäsen iskä töşerde. Anda bäxäsle oçraqlarda üzäk häm töbäk cileşü protseduraların qullanırğa tieş, dip yazılğan. Ä 77 matdädä töbäklärneñ däwlät xakimiäte möstäqil räweştä oyıştırıla digän.

Mondıy qaraşta toruçı säyäsätçelär häm töbäklär bik küp. Xakimiät reforması turındağı mäğlüm qanun proyektı ikençe uqılışta Däwlät Dumasında qaralğanda, bu tözätmälär isäpkä alınırmı, yuqmı — älegä mäğlüm tügel. Ämma, 13 sentäberdä Putin iğlan itkän xakimiät reformasın xuplağan Mintimer Şäymievnıñ töbäklärdä xalıq saylap quyğan parlamentlarnı saqlawda kisken pozitsiäse küzgä taşlana.

Zvezda Povolj'ya gäcitendä R.Kamalov digän serle imza belän Mirotvortsı dip atalğan mäqälä basılıp çıqtı. Avtor akademik İndus Tahirov häm Başqortstannıñ Tel, ädäbiät, tarix institutı direktorı İldus İlişev citäkçelegendäge komissiälär äzerlägän xezmättäşlek planınıñ qayber matdälären tänqitli. İke respublika arasındağı duslıqnı nığıtırğa qomaçawlağan kisken problemalarnı sanap çığa. Ämma, xäzergä äle menä şuşı tänqitle mönäsäbätne räsmi räweştä beldergän konkret oyışma yäki şäxeslär kürenmi. Şulay uq, komissiä äğzäläreneñ añlatması da iğlan itelmägän. Kiläçäktä bu mäs’älägä açıqlıq kertü, bälki bäxäsläşü öçen Azatlıq radiosı da tieşle keşelärgä möräcäğät itär.

Pänceşämbe könne Tatar kongressı binasında Başqarma komitet äğzäse, yazuçı Fäwziä Bäyrämova häm yurist Cämil Safiullin jurnalistlar belän oçraştılar. Fäwziä Bäyrämova küptän tügel Başqortstanda wafat bulğan cırçı Vener Mostafin faciğäseneñ säbäplären tikşerü öçen Ufağa barıp cıyğan mäğlümätlären jurnalistlarğa söylägän. Vener Mostafinnıñ wafat buluına ber atna ütep kitte. Xäzerge Tatarstan mäğlümat çaralarında bu turıda söylämädelär diärlek.

Rimzil Wäli

XS
SM
MD
LG