Accessibility links

сишәмбе, 6 декабрь 2016, Казан вакыты 19:13

Yäsir Arafatnıñ wafatına reaksiä


İrtänge programabızda xäbär itkänebezçä, Fälästinnärneñ citäkçese Yassir Arafat bügen irtän Fransiädä xärbi xasataxanädä vafat buldı. Anıñ vafatı kötelsä dä, reaksiä köçle buldı.

Arafatnıñ ülem xäbären işetkäç, Könbatış Yordan üzänendä häm Gaza sızığında yäşävçe Fälästinnär bayraqlar häm anıñ portretların kütärep uramnarğa ağıldılar. Ber ir at belän ber xatın-qıznıñ äytkännäre.

Audio

"Bez matäm totabız. Ul citäkçe, simbol häm bezneñ väkilebez ide. Allahın räximätendö bulsın."

Audio

"Xalıq, millät Arafatnı yarata ide . Ul oluğ , xörmät itelgän citäkçe ide. Allahnıñ raxmätendä bulsın. "

Arafat kiñäşçese Yasser Abed Rabbo fälästinnärneñ qayğısın bolay dip añlattı.

Audio

"Üzeneñ oluğ citäkçese Yassir Arafatnı yuğaltqan Fälästin xalqı, Fälästin Milli xäräkäten oyıştıruçı , zamança tarixınıñ iñ zur şäxese häm tormışın xalqınıñ ireklege häm bäysezlege öçen qorban itkän şäxes bularaq anı xörmätlärgä tieş. "

Fälästin cirendä 40 könnek matäm iğlan itelde. Arafat belän saubulaşu Comğa könne Qähirädä bulaçaq häm ul Şimbä könne Ramallahda kümeläçäk dip belderelä. Fälästin Azatlıq Oyışmasınıñ Başqarma komitetı vaqıtlı citäkçe itep Mahmud Abbasnı sayladı. Ä inde parlament süzçese Rauhi Fattuh 60 köngä prezident vazıyfasın ütiäçäk. Şuşı möddät eçendä przident saylauları ütkärelergä tieş. Reaksiälärgä kilgändä, Arafatqa qarata häm maqtaulı häm tänqitle belderülär yasaldı. Soñğı yıllarda Arafatnı çitlätergä tırışqan AQŞ prezidentı Buş kileşüçän tonda söyläde. Ul Arafatnıñ vafatı Fälästinnärneñ tarixında borılış noqtası bulıp tora, Fälästin xalqınıñ kürşeläre belän tnıçlıqta yönöşö yäşägän bäysez häm demokratik Fälästin dävläten buldıru omtılışı ğämälgä aşar digän ömet belderde. Ul tağı bolay dide

Audio

"Bu bulaçaq dip ışanam. Hörkem ireklektä yäşärgä omtıla dip ışanam. AQŞ irekle cämğiät buldıruğa häm şulay itep fälästinnärgä üz dävlätçelegen tözügä yardäm itärgä äzer tora."

İzrael premeire Şaron Arafatnıñ vafatı Yaqın Könçığışta borılış noqtası bula ala, tınıçlıqqa taba progess terrornıñ tuqtaluınnan bäyle dip belderde.

Audio

"Min Fälästinnärneñ yaña citäkçelege mönäsäbätlärneñ täräqqiäte häm problemmalarnı xäl qılu, berençe oçraqta terrornıñ tuqtaluınan häm anıñ terrorğa qarşı suğışta qatnaşuınnan bäyle bulun añlar dip ömetlänäm Bu bulır häm bez politik xäl çarasın taba alırbız dip ömetlänäm."

Russiä prezidentı Putin Arafatnıñ vafatı Fälästin citäkçelege häm fälästin xalqı öçen zur yuğaltu buldı digän belderü iğlan itte. Fransiä prezidentı Jak Şiraq Arafat fälästinärneñ dävlätçelek tözü köräşen gävdäländergän, moña ışanğan qıu şäxes ide dip belderde. Ğäräp illäre Ligasını general sekretarı Amr Moussa bolay dide

Audio

"Bez här närsä uñay bulır häm Fälästin mäsäläsendä alğa taba kiteş bulır dip ömet itäbez. Arafat ğömere buyınça Fälästin mäsäläse öçen eşläde häm bez Fälästinnärneñ Könbatış Yordan üzäne belän Gaza sızığında dävlätkä iä bulu xoquqın yaqlauıbıznı dävam itteräçäkbez. "

Törkiäneñ tışqı eşlär ministere Abdula Gül bolay dide

Audio

"Fälästin dävläte bu regionda tözeläçäk. Min Törek xalqınıñ fälästin xalqınıñ qayğısın urtaqlaşuın tağı ber märtäbä belderäm Xökümätebez häm dävlätebez Fälästin mäsäläsen yaqlauın dävam itäçäk."

Britaniä premiere Blair. Germaniä kanslerı Şröder, Avstraliä premiere Howard häm başqa bik küp illärneñ citäkçeläre, säyäsmännäre, cämğiät eşlekleläre , Yassir Arafatnıñ vafatına qarata üz reaksiälären belderdelär.

Färit İdelle, Praga.
XS
SM
MD
LG