Accessibility links

җомга, 9 декабрь 2016, Казан вакыты 03:15

Ukraina: prezident saylawlarınıñ berençe turında alda Viktor Yuçenko bara


Ukrainanıñ Üzäk saylaw komissiäsenä, äle üktäbrneñ 31-endä ük ütkän prezident saylawları näticälären iğlan itü öçen 10 kön waqıt kiräk buldı, xörmätle tıñlawçılar. Alardan kürengänçä, iñ küp tawışnı berençe turda räsmi nämzät Viktor Yanukoviç tügel, ä oppozitsiä citäkçese Viktor Yuçenko cıyğan. Ayırma zur bulmasa da, bu Yuçenkonıñ ruxın kütärü öçen möhim näticä. İkençe turda anı Ukraina sotsialistları citäkçese dä yaqlayaçağın belderde. İlne yänä ayawsız saylawaldı köräşe kötä.

Saylawlarnıñ berençe turı näticäläre räsmi töstä Kievtä çärşämbedä iğlan itelde. Ukrainanıñ Üzäk saylaw komissiäse räise Serhiy Kivalov, berençe urınğa çıqqan Viktor Yuçenkonıñ 11 million 125395 tawış qazanuın äytte.

Audio, Serhiy Kivalov

Xäzerge xakimiat yaqlağan nämzät, premyer-ministr Viktor Yanukoviç isä añardan yartı protsentqa qalığa, anı 10 million 966579 saylawçı yaqlağan.

Audio, Serhiy Kivalov

Qalğan nämzätlärne yaqlaw alay uq köçle tügel, öçençe urında torğan Oleksandr Moroz, misal öçen, tawışlarnıñ yaqınça 6 protsentın ğına qazanğan. Viktor Yuçenko iğlan itelgän sannardan üzeneñ qänäğät buluın belderä.

Audio, Viktor Yuçenko

"Minem Yanukoviçtän 155 meñ kübräk tawışım bar, bu saylawçılarnıñ yartı protsentı digän süz. Bez şul meñnärneñ häm protsentlarnıñ ähämiaten bik yaxşı beläbez, bu kürenep tora häm xätta xökümät tä monı xäzer yäşerä almıy" di töp oppozitsiä nämzäte Yuçenko. Moña qädär Ukraina xakimiate, tawışlarnıñ küpçelegen, ayırma ällä ni zur bulmasa da, xäzerge premyer Viktor Yanukoviç cıydı dip kilä ide. Çärşämbe könne bäyän itelgän näticälär anıñ tarafdarların şomlandırdı häm küñelen töşerde. Yanukoviçneñ saylawaldı eşlären alıp barğan Serhiy Tıhıpko:

Audio, Serhiy Tıhıpko

"Bez barıbız da näticälär belän ni buluın beläbez häm añlıybız. Fiker beleşülärgä qarağanda, Yanukoviç 3-4 protsent alda barırğa tieş ide, ämma könbatış Ukrainada tawış birergä kübräk xalıqnıñ kilüe arqasında bar närsä dä üzgärde" dip uftana Yanukoviçnıñ räsmi wäkile. Tawış birüne küzätep barğan xalıqara küzätüçelär häm oppozitsiä Ukraina xakimiatnen inde bolay da, saylawlar waqıtında törle xärämläşülärgä baruda ğäyeplägän ide. Premyer tarafdarları da üz yağınnan Yuçenkonıñ "Bezneñ Ukraina" berläşmäsen, ilneñ könbatışında qayber saylaw wäkillärenä rişwät birep, oppozitsiä nämzäte faydasına yalğan tawışlar östäwdä ğäyepläde. Läkin "Bezneñ Ukraina" kiresençä, näq menä xakimiat qulındağı Üzäk saylaw komissiäse Yuçenkonı yaqlap birgän 200 meñläp tawışnı yuqqa çığardı dip belderä. Bu xaqta berläşmäneñ yuğarı wäkile Yuriy Kostenko äytte. Anıñ süzlärençä, komissiäneñ şuşı qararı bik qurqınıç ber ğämäl bulıp tora, ämma Yuçenkonıñ berençe turda ciñüe, noyäbrneñ 21-enä bilgelängän ikençe turda oppozitsiä öçen zur etärgeç bulaçaq.

Audio, Yuriy Kostenko

"Saylawçılar bügen şuşı çiñü uñayınnan şatlıqlarınnan cırlar cırlayaçaq, alarnıñ üz köçenä ışanuı artaçaq" di Kostenko. Bu çärşämbedä bäyän itelgän fiker beleşü näticäläre, ikençe turda qatnaşırğa cıyınğan xalıqnıñ 47 protsentı Yuçenko, ä 40 prostentı Yanukoviç öçen tawış biräçägen farazlıy.

Kärim Kamal
XS
SM
MD
LG