Accessibility links

сишәмбе, 6 декабрь 2016, Казан вакыты 13:19

Fallucada amerikan xärbiläre şähärne qullarına eläkterä baralar


AQŞ xärbiläre Falluca şähäreneñ 70 protsetın kontrol itülären belderälär. Auır qorallar häm xärbi hava köçläre yardämendä alıp baılğan höcüm näticäsendä şähärneñ tulısınça alar kontrolenä küçüe kötelä. Läkin, qarşılıq kürsätüçelär Ğıraqnıñ başqa töbäklärendä üzäk häm könyaq Ğıraqta xökümät qorılmalarına höcüm itälär.

Fallucada bäreleşlär inde 4-nçe kön dävam itä. AQŞ köçläre qarşılıq kürsätüçelärne şähärneñ könyaq öleşenä çigenergä mäcbür itsälär dä, alar äle dä qatı qarşılıq kürsätälär häm ammunitsiäne betä baruın kürsätkän işarälär dä yuq. AQŞ saqlanu ministere Rumsfeld El Slvadorğa yasağan vizitı vaqıtında jurnalistlar belän oçraşqanda, yözärlägän qarşılıq kürsätüçe üterelde dip belderde.

Audio

"Qayber qarşılıq kürsätüçelärneñ operatsiä başlanır aldınan Fallucahdan kitkän buluına şigem yuq. Anda qalğannar arasında yözärlägän suğışçınıñ üterelgänen dä beläbez. Qağannarı totıldı"

AQŞ xärbiläreneñ belderüenä qarağanda, AQŞ höcüme başlağanda şähärdä qalğan dip xisaplanğan 3 meñ çaması suğışçınıñ 600e üterelgän. Bäreleşlär vaqıtında 18 amerikan xärbise belän 5 ğıraq soldatı da hälak bulğan. 178 amerikan häm 34 ğıraq xärbise yaralanğan. Rumsfeld qorallı bäreleşlärneñ qayçan tuqtalaçağın farazlaudan baş tarttı, läkin , näticä turında şik bula almıy dip belderde.

Audio

"Küpmegä suzılçağı turında farazlaunıñ kiräge yuq. Ul kiräk bulğan möddätçä dävam itäçäk . Läkin, näticäle tämamlanaçaq häm Fallucah terrorçılar yäisä radikallar öçen imin sıyınu urnı buldan tuqtalaçaq. "

300 meñ keşelek şähär xalqınıñ zur öleşe bäreleşlär başlanır aldınan annan çığıp kitte. Läkin, qalğan 50 meñ çaması tınıç xalıqnıñ xäle bilgesez. Ğıraq Qızıl Ay oyışması väkile andağı bäreleşlärne zur fäciğä dip bäyäläde häm AQŞ köçläre belän Ğıraq xökümäte anda sivil xalıqnıñ sälämätlege häm igelege öçen cavaplı dip belderde. AQŞ häm Ğıraq köçläre Fallucahnı üz kontrollärenä alırğa tırışqanda, qarşılıq kürsätüçelär ilneñ başqa töbäklärendä höcümnär oyıştıralar. İlneñ Tönyağında Musulda alar militsiä binasın basıp, qorallarnı urladılar häm anı şartlattılar. Amerikan gazetası Nyu York Timsnıñ yazuınça, Musuldağı tärtipsezleklär säbäple Fallucadağı amerikan xärbiläreneñ ber öleşe Musulğa cibärelgän. Uzğan atnada Ğıraqnıñ başqa şähärlärendä dä, şul sanda Samarra, Baquba, Tikrit , Ramadi häm Bagdatnıñ qayber öleşlärendä atışular buldı, bombalar şartladı häm maşinalarğa quyılğan bombalar da şartllatılğan ide.

Färit İdelle, Praga
XS
SM
MD
LG