Accessibility links

якшәмбе, 4 декабрь 2016, Казан вакыты 09:03

75 yäşendä wafat bulğan Fälästin citäkçese Yäsir Arafat Ramallağa qaytarılıp cirlände


Comğa könne dönya cämäğätçelege Fälästin citäkçese Yäsir Arafat belän xuşlaştı. Mısır başqalası Kahirädä ütkän xuşlaşu möräsimendä distälägän ilneñ räsmiläre qatnaştı. Soñnan anıñ mäyete Ramallağa kiterelde. Arafatnı soñğı yulğa ozatuğa meñlägän keşe cıyıldı.

40 yıl buyına Fälästin xalqınıñ qarşılıq xäräkäten ğäwdäländergän Yäsir Arafatnıñ cenazasın dönya telekompaniäläre comğa könne turı efirda kürsätte. Pänceşämbe irtäsendä Fransiäneñ xärbi xastaxanäsendä wafat bulğan Arafatnıñ mäyete başta oçqıç belän Mısır başqalası Kahirägä kiterelde. Mısır Arafatnıñ ikençe yortı ide. Üze ul, tuğan urınım İerusalim dip beldersä dä, biografları anı Kahirädä tuğan dip yaza. Säyäsi eşçänlegen dä Arafat uzğan ğasırnıñ 50nçe yıllarında näq menä şunda başlağan. Comğa könne Kahirädä Arafat belän xuşlaşu möräsimendä distälägän ilneñ räsmiläre qatnaştı.

Şunnan soñ Arafatnıñ Fälästin eläme belän yabılğan tabutta mäyete Ramallağa ozatıldı. Mısırnıñ xärbi oçqıçı başta anı çik buyındağı Äl-Äriş qalasına kiterde. Annan ul boralaqlar belän Ramallağa kiterelde. Arafat belän xuşlaşırğa dip Ramallağa distälägän meñ keşe cıyıldı. Fälästinneñ iminlek xezmätläre hawağa ut açıp bu xalıq taşqımın tıayrğa tırışsa da, meñlägän keşe politsiä kirtälären izep boralaq töşäse urınğa yabırıldı.

Köç-xäl belän boralaqtan çığarılıp Arafatnıñ mäyete kümeläse urınğa küçerelgändä meñlägän keşe anı "Allahu Akbar!" qıçqırıp soñğı yulğa ozattı. Bu kierenke wazğiättä, oyıştıruçılar, cenaza yulasın qısqartırğa mäcbür buldı. Näticädä Arafat waqıtınnan aldaraq cir quyınına salındı.

Qayber mäglümätlärgä qarağanda Arafat İerusalemnıñ Äl-Aqsa mäçete yanında cirlänü telägen äytep wasiät qaldırğan. Ämmä İzrail moña kisken qarşı çıqtı. Fälästin räsmiläre, kiläçäktä, Fälästin däwläte tözelgäç, Arafatnı küçerep cirlärgä wäğdä itä. Älegä Arafatnıñ qäberenä möselmannar öçen izge sanalğan bu urınnan tufraq kiterelep salınğan.

Şulay itep, Fälästinneñ qarşılıq xäräkäten 40 yıl citäklägän Yäsir Arafat fani dönyadan kitep bardı. Fälästin citäkçelegendä anı anıñ salmağraq qaraşta torğan tarafdarları alıştırdı. Arafat kitkännän soñ xäzer Fälästin belän İzrail arasında solıx tözügä yul açıla dip ömetlänüçelär bar. İzrail genä tügel, küplär öçen ul berençe çiratta terrorçı ide. Läkin Fälästinlelär öçen Yäsir Arafat bäysez däwlät xıyalı bilgese ide. Comğa könne ütkän cenaza monı açıq kürsätte.

-Ali Gilmi
XS
SM
MD
LG