Accessibility links

дүшәмбе, 5 декабрь 2016, Казан вакыты 11:42

Ramazan ayınıñ soñğı könnärendä Yekaterinburda iftar mäclese uzdırıldı


Ramazan şärif ayınıñ soñğı könnärendä Yekaterinburg şähärendä urnaşqan Tınıçlıq häm Duslıq yortında möselman qärdäşlär öçen iftar mäclese uzdırıldı. Mäcleskä Sverdlov ölkäseneñ törle poçmaqlarınnan imamnar, ictimaği oyışmalar wäkilläre cıyıldı. Mul itep äzerlängän tabın yanında süz Sverdlov ölkäsendä dinneñ üseşe, bu ölkädä başqarılğan eşlär turında bardı. Arada yaña keşe – Yuğarı Pışma şähäre mäçetenä imam itep küptän tügel Tatarstannan birle çaqırtıp kitertelgän Ayrat xäzrät Möxämmätcanov bik moñlı, matur itep qor’än uqıdı. Ayrat xäzrät çığışı belän Tatarstannıñ Balıq Bistäse rayonınnan, beleme belän tarixçı, küp yıllar mäktäptä uqıtqan. Annan soñ tormışnıñ mäğnäse, din belän çınlap torıp qızıqsınıp kitkän häm bu ölkädä zur uñışlarğa ireşkän. Mölayım yözle, tınıç xolıqlı, ämma turı fikerle bu keşe ber qaraştan uq bik uñay tä'sir qaldıra. Ayrat xäzrät din qärdäşläre aldında alda torğan uy-fikerläre belän urtaqlaştı. Başqa imamnar da üzläreneñ eşläre turında söylädelär. İftar bik cılı, dustanä atmosferada uzdı.

Küptän tügel Yekaterinburg şähäreneñ ofitserlar yortında olı tantana bulıp uzdı. Belarus' Respublikası prezidentı Aleksandr Lukaşenko Ukazı buyınça, Belorussiäne faşistlardan azat itügä 60 yıl tulu uñayı belän, ul frontta qatnaşqan, bügenge köndä isän qalğan frontoviklarnı medal'lär belän büläklädelär. Büläklänüçelär arasında biş tatar keşese dä bar ide. Gabbas ağa İslamov, Roza apa İbrahimova, Näğim ağa Ğizzätullin, Timerşäyex ağa Näbiev, Tälğät ağa Tyatigaçev bügen inde bik olı keşelär. Alarnı iskä alıp, öyermäle yıraq yäşlek yılları xatiräsen yañartıp, olı büläk birü waqiğası alarnıñ küñellären neçkärtep cibärde. Alar cıyıluçılarğa olı räxmät belderdelär.

Böyek Ciñügä 60 yıl tulu bäyrämen qarşılawğa äzerlek törle yaqlap bara. Yekaterinburg şähärendä eşläp kilüçe Milli Media-Xolding bu bäyrämgä bağışlap Uralda yäşäwçe suğış batırları turında videofil'mnar icat itü östendä eşli. Küptän tügel millättäşebez, Sovetlar Soyuzı Geroe Sälimcan Galimcanov turındağı fil'm östendäge eş tämamlandı. Fil'm ozaqlamıy ölkä televideniese kanalında dönya küräçäk.

Küptän tügel Yekaterinburg şähärendä millätara mäğlümat üzäge terkälde. Üzäkneñ töp burıçı – küpmillätle Sverdlov ölkäse xalıqlarınıñ milli tormışı waqiğaların yaqtırtu. Monıñ öçen internet çeltärendä maxsus sayt açu küzdä totıla. Şulay uq milli yañalıqlar turında gazeta näşer itü, ä yaña yıldan başlap ölkä televideniese kanalında millätara tapşıru çığara başlaw planlaştırıla. Tapşıru çığımnarın ölkä xökümäte kütärer digän ömet bar.

Fäwiä Safiullina, Yekaterinburg

XS
SM
MD
LG