Accessibility links

«Uralsib» bankı Başqortstan baylığın üzläşterdeme?


Başqortstandağı iñ zur finans oyışması – «Uralsib» korporasiäseneñ tulısınça Mäskäw qaramağına küçäçäge xaqında süzlär küptän yöri ide inde. Menä şul farazlar çınğa aşa kebek. Bu xaqta «Uralsib» finans korporatsiäse direktorlar sovetınıñ çirattağı utırışında barğan söyläşülärdän añlarğa mömkin. «Uralsib» qorporatsiäse Ufanıñ näq üzägendäge iñ biek häm iñ zamança binanı biläp tora. Älbättä, bank mölkäte tulısınça diärlek Mäskäwgä küçsä dä, anıñ binası Ufada torıp qala. Ä menä Başqortstanıñ bu qorporatsiä qäpitälındağı öleşe tağın da kimiäçäk. Moñarçı Başqortstannıñ aksionerlıq öleşe bu finans oyışmasında 19 protsent çaması bulsa, xäzer ul 12 protsentqaça kimer dip farazlana. «Uralsib» korporatsiäse direktorlar şurası äğzası, Başqortstan finans ministrı Ayrat Ğäskärov jurnalistlar belän oçraşuda respublik bu finans oyışmasında üz täesiren bik yuğaltmayaçaq, dip beldersä dä, bäysez iqtisad belgeçläre monıñ kiresen farazlıy. Soñğı yıllarda Rusiä külämendä zur üseş alğan «Uralsib» bankı eşçänlege xaqında «Azatlıq» radiosı tıñlawçılarına daimi räweştä mäğlümat birep torıldı. Başta ul «Başkreditbank» dip atala ide häm anıñ böten baylığı Başqortstan xökümäte qulında buldı. Bu banknı üsterügä respublik üzeneñ bik küp baylıqların saldı. «Başkreditbank»qa respublik prezidentı Mortaza Räximovnıñ tuğanınıñ ulı Azat Qormanayıv citäkçelek itüen dä küplär belä ide. Soñraq bu bank «Uralsib» banqı dip üzgärtelde häm ul tağın da zurayıp Rusiäneñ başqa töbäklärendä dä üz eşçänlegen kiñäytep cibärde. İke yıl elek isä Qormanayıv äfände bu bank citäkçese wazıyfasın qaldırdı häm Başqortstannı taşlap kitte. Qayber xäbärlärgä kürä, elekke bankir äfände küptän inde Amerikä Quşma Ştatlarında yäşäp yata.

Qormanayıv citäkçelektän kitkännän soñ, «Uralsib» banqı küp kenä üzgäreşlär kiçerde häm Başqortstan bu finans oyışmasında üzeneñ mölkäten bik kimette. Bügenge köndä, aldaraq ta äytelüençä, barlıq qäpitälnıñ 19 protsentı ğına Başqortstan öleşenä tiä. Cämägätçelek arasında «Uralsib» qorporatsiäseneñ Başqortstan baylığın üzläşterüye, çitkä alıp kitüye xaqında fiker taralğan. Bu banknı tözü, anıñ qäpitälın yıldan – yıl arttıru öçen Başqortstan byüdjetınnan millionnarça dollar aqça küçerelgänlegen belgän iqtisadçılar da «Uralsib» qorporatsiäseneñ Mäskäw qaramağına küçep betüenä ükeneç belderä.
XS
SM
MD
LG