Accessibility links

Кайнар хәбәр

Başqortstan tatar oyışmaları matbuğat oçraşuı ütkärä


Tanılğan tatar cırçısı Vener Mostafinnıñ faciğäle üleme Başqortstan tatar cämägätçelegeneñ iğtibar üzägendä qala. Älege ğädättän tış xäl Tatarstandağı millättäşlärebezne dä quzğatıp cibärde. Kiñ bilgele millätpärwär häm yazuçı Fäwziä Bäyrämowa belän Bötendönya Tatar kongressınıñ Keşe xoquqları yaqlaw qomitetı äğzası, xoquqçı Cämil Säfiullinnıñ Ufağa kilep kitüye häm Qazanğa äylänep qaytqaç, şuşı säfär yomğaqları buyınça matbuğat oçraşuı ütkärüye dä älege faciğäneñ ayırım ber keşeneñ ayanıçlı yazmışı ğına bulmawın, ä Başqortstandağı bar tatar xalqına qağılışı bulğan waqıyğa ikänlegen raslıy. Fäwziä Bäyrämowa matbuğat oçraşuında Başqortstanda tatarlarğa qarata faşizm ısulları qullanıla dip beldergän.

Başqortstan Tatar milli oyışmaları berlege räise Ramil Bignov 12 noyäbrdä «Azatlıq» radiosı xäbärçese belän söyläşüendä Ufadağı tatar milli xäräkäte liderlarınıñ tanılğan cırçı Vener Mostafinnıñ faciğäle üleme uñayınnan kisken töstäge Belderü äzerläp betüen äytte. Belderüneñ eçtälege 16 noyäbr könne Ufada ütäçäk matbuğat oçraşuında bäyän iteläçäk häm ul anda kilgän barlıq jurnalistlarğa taratılaçaq. Ramil äfände kiläse atnanıñ sişämbe könendä irtänge 11 säğättä ütäçäk matbuğat oçraşuına Rusiäneñ üzäk häm qayber çit illärneñ mäğlümat çaraları xäbärçeläreneñ çaqırıluın äytte. Anıñ süzlärençä, älege matbuğat oçraşuında Başqortstan tatarlarınıñ 27 noyäbr könne Ufada ütäçäk zur qorıltayına äzerlek xaqında da süzlär bulaçaq. 13 noyäbrdä Başqortstan tatarlarına qağılışlı tağın ber möhim waqıyğa bula. Başqortstan Tatar ictimağıy üzäge üzeneñ çirattağı plenumın ütkärä. Anda da Başqortstan Tatar ictimağıy üzäge aldında torğan burıçlar xaqında söyläşü belän berrättän, 27 noyäbrdä ütäçäk qorıltayğa äzerlek mäsäläläre dä tikşereläçäk. Bu xaqta BR Tatar ictimağıy üzäge räise Ayrat Ğiniätullin xäbär itte.
XS
SM
MD
LG