Accessibility links

җомга, 9 декабрь 2016, Казан вакыты 05:11

Amerikannar Fällucada uñışqa ireşüe xaqında belderä, ä menä Mosulda xällär kierenkelänä


İlneñ üzägendä yatqan Fälluca şähärendä inde menä altınçı kön qatı bäreleşlär bara, amerikan ğäskäriläre anda xökümät köçläre belän bergä, yaña xakimiatkä qarşı qorallı köräş alıp barğan ğisyançılarnı yuq itärgä tırışa. Quşma Ştatlarnıñ xärbiläre, şuşı ğäskäri operatsiä älegä yaxşı bara dip belderä, häm üzläreneñ, şähärneñ 80 protsent öleşen yawlap aluın xäbär itä.

Fälluca höcümendä qatnaşqan amerikan marinnarı başlığı general John Sattler, eşlär ifrat ta uñışlı bara digän kütärenke ruxlı belderü belän çıqtı:

Audio, John Sattler

"Höcüm bik äybät bara häm bez doşmannı qısrıqlap çığarunı Fälluca şähäre anıñ xalqına qaytarıp birelgänçe däwam itäçäkbez" di amerikan generalı. Sattler süzlärenä qarağanda, şähärneñ zur öleşe inde ğisyançılardan çistartılğan. Ämma ul berük waqıtta, alda äle şaqtıy eş başqarası bar dip tä belderä.

Audio, John Sattler

"Xäzerge waqıtta bez şähärneñ 80 protsentın yawlap alğan xäldä. Äle haman da här öyne tikşerep, andağı qorallarnı cıyu häm suğış kiräk-yaraqların ezläw bara. Şuña kürä, inde äytelgänçä, bez şähärneñ 80 protsentın üz qulıbızda totsaq ta, alda şaqtıy eş başqarası bar" dip belderä Fällucadağı amerikan generalı Sattler. Soñğı atnalarda Ğiraqtağı qarşılıqnıñ üzäge bulğan şuşı şähärdäge uñış turında comğa könne Quşma Ştatlar prezidentı George Bush ta söylägän ide, ul, Fällucağa iminlek qaytaru yünäleşendä amerikan köçläre möhim adım yasadı dide. Läkin Ğiraqnıñ üzägendä bu ölkädä uñay täräqqiat küzätelsä, ilneñ tönyağındağı Mosul şähärendä yaña front açılıp kilä sıman. Ğisyançılar anda politsiä bülekçälärenä höcümnär yasap, xäzer inde uramnarda açıqtan-açıq qorallı kizü yöri dip xäbär itelä. Belgeçlär fikerençä, Mosuldağı xällär amerikannarnıñ Fällucadağı höcümenä cawap bula ala, çönki ul Ğiraqta Quşma Ştatlarğa qarşı käeflärne köçäytte. Amerikan yağı üzeneñ Fällucadağı uñışı turında beldersä dä, anda ğadi xalıq arasında nindi yuğaltular buluı xaqında mäğlümat birmi. Törle yardäm oyışmaları bu uñaydan zur borçılu belderä, doşmanlaşqan taraflar arasındağı suğışlardan berençe çiratta ğadi keşelär zian kürä dip belderä. Şimbä könne Ğiraqnıñ Qızıl Yarımay cämğiate wäkile Firdäwes äl-Äbädi Fällucadağı wäzğiatne "hälakät" dip bäyäläde. Anıñ süzlärenä qarağanda, şähärdä qalğan keşelär xäzer aşığıç räweştä eçär suğa, azıq-tölekkä häm meditsina kiräk-yaraqlarına moxtac. Moñardan tış, Fällucadan qaçıp kitkän häm xäzerge waqıtta qaçaq utarlarında tuplanğan distälägän meñ keşeneñ dä yazmışı borçu uyata. Bagdadtan Fällucağa älegä 4 yök maşinası belän aşığıç yardäm cibärelde. Räsmi mäğlümatqa qarağanda, andağı bäreleşlärdä 22 amerikan xärbie, 5 Ğiraq ğäskärie hälak bulğan.

Kärim Kamal
XS
SM
MD
LG