Accessibility links

пәнҗешәмбе, 8 декабрь 2016, Казан вакыты 13:02

Pakstan ilneñ tawlı töbäklärendä islamçı ğisyançılar qaldıqların tiz arada beteräçägen wäğdä itä


Pakstan xärbiläre inde yaqın aralarda uq ilneñ Äfğanstan çige buyındağı tawlı töbäklären törle islamçı ğisyançılardan, berençe çiratta mäğlüm "äl-Qaidä" qaldıqlarınnan arındıraçağın wäğdä itä. Bu xaqta Pakstan qorallı köçläreneñ Könyaq Wäziristan wilayätendä şul islamçılarğa qarşı höcüm alıp barğan xärbi bülekçäläre başlığı general Niaz Xattak belderde.

Ul monı altı atna eçendä, şuşı yıl azağına qädär eşliäçägen äytä. Yäkşämbe könne general ilneñ ütep kerüe bik qatlawlı bulğan şuşı tawlı töbägendä Pakstan xärbiläreneñ nindi uñışlarğa ireşüe xaqında söyläde.

Audio, Niaz Xattak

"Könyaq Wäziristanda bez ähämiatle uñışlarğa ireştek, islamçılarnıñ zur öleşen xälsezländerdek, töp nığıtmaların yuq ittek. Bez alarnıñ ruxın sındırdıq häm berük waqıtta keşelärdä, üz cirlärenä qaytıp alarnı ğisyançılardan tartıp aluğa ışanıç uyattıq" di Pakstan xärbi citäkçese, üz qulı astındağı ğäskärilärneñ islamçılarğa qarşı köräşendä uñışı turında. Älege belderüen general Xattak Könyaq Wäziristandağı Kärwänä Manzay nığıtmasında yasadı, şuşı ähämiatle urın sintäbr ayında yawlap alınğan ide. Şunnan birle aña islamçılar härdaim höcümnär yasap tordı, Pakstan generalı süzlärenä qarağanda, alar "äl-Qaidä" suğışçılarınıñ üzbäklär, çäçännär, taciqlar, äfğannardan torğan häm cirle qabilä başlıqları belän kileşep yäşägän tübänräk däräcäle öleşen täşkil itä. General Niaz Xattak, Pakstan qorallı köçläre bügenge köndä Könyaq Wäziristannıñ dürttän öç öleşen üz qulında tota häm xäzerge waqıtta, wilayätneñ qalğan öleşen dä, anıñ tönyağındağı tawlı urınnarın çistartu äzerleklären kürä dip belderde. Soñğı könnärdä Pakstan xärbiläre şuşı yaqlarda zur qoral saqlağıçına tap bulğan, ul elek Quşma Ştatlarnıñ Guantanamo nığıtmasında totılğan Abdullah Mäqsüt isemle qabilä başlığı keşeläreneke bulğan dielä. Mäqsüt üze Pakstan xakimiate ezlägän islamçılar isemlegendä şaqtıy yuğarı urında tora. Anıñ xäzer qayda buluı xaqında mäğlümat yuq. General Xattak yäkşämbedä, Mäqsütneñ älegä kontrol''gä alınmağan tawlı ölkägä qaçuı ixtimal dip belderde. Uzğan ayda ul ike qıtay möhändisen urlawda ğäyeplängän ide. İslamçı ğisyançılarğa kitergän zianğa kilgändä, Pakstan qorallı köçläre bu ayda ğına 40-lap suğışçını üterüe xaqında söyli. Moñardan tış alar berniçä yäşeren urınnı da yuq itkän. Martta başlanğan şuşı ğäskäri operatsiä barışında yaqınça 300-läp islamçı üterelde dip xäbär itelä, noyäbrneñ berençe yartısında yuq itelgännär sanı artuı, Pakstan qorallı köçläreneñ höcümne köçäytep cibärüen kürsätä. Quşma Ştatlar häm kürşe Äfğanstan wäkilläre farazına qarağanda, 2001-nçe yıl azağında "Taliban" xakimiate tar-mar itelgännän soñ Äfğanstannan Pakstannıñ qabilälär genä yäşägän tawlı töbäklärenä "Taliban" häm "äl-Qaidä"neñ yözlägän suğışçısı qaçqan bulğan. Pakstan xärbiläre xäzer şularnı yuq itü eşen alıp bara, çikneñ äfğan yağında isä monı Äfğanstandağı amerikan ğäskärläre başqara.

Kärim Kamal
XS
SM
MD
LG