Accessibility links

якшәмбе, 4 декабрь 2016, Казан вакыты 19:19

Räzil Wäliev: "Bezneñ berdänber yulıbız qala – xalıqara mäxkämägä möräcäğät itü."


Tatarstan Däwlät sovetında latin grafikasına qaytu-qaytmaw mäsäläsen ğädättä yazuçı deputatlar kön qadağına quyıp kildelär. Şularnıñ berse Räzil Wäliev. Azatlıq anıñ belän elemtägä kerde. Razil äfände eşlekle säfär belän Törkiädä, İstanbul şähärendä bulıp çıqtı. Konstitutsion mäxkämä qararı belän äle tanışırğa ölgermägän.

Mondıy qarar bezneñ öçen zur yañalıq bulmadı. Bu säyäsi qarar buldı. Läkin bez bu qarar belän tuqtap qalmıybız. Latinğa qaytu Tatarstannıñ ğına tügel, tatar kongressı qararı da. Bez ul qararnı öyränerbez. Bezneñ berdänber yul Strasburgtağı Xalıqara mäxkämägä möräcäğät itü. Bezneñ başqa çara yuq.

Färit Möxämmätşin, Tatarstan parlamentı citäkçese Rusiä Konstitutsiä mäxkämäse qararı belän rizalaşuın häm başqa orğannarğa möräcäğät itmäwen beldersä dä, Räzil Wäliev Strasburgtağı xalıqara sudqa möräcäğät itüdän tış, bezneñ başqa çara yuq dip belderde. Xäyer, xalıqara sudqa ayırım oyışmalar ğına tügel, ä ayırım keşelär dä möräcäğät itä ala. Älbättä monıñ öçen kesäñdä aqçañ ğına citärlek bulsın.

Latinğa räsmi küçü-küçmäwneñ yazmışın xäl itärgä torğan Konstitutsion mäxkämä qararı turındağı mäğlümat xalıqqa tarala başlağaç uq, “Azatlıq”nıñ Qazan byurosına şaltıratıp fiker belderüçelär şaqtıy buldı.

İnde şunı ğına äytäse qala, Tatarstan tatarnıñ nindi yazuda yazarğa tieşlelegen üze bilgelärgä xoquqlı bulın mäxkämälärdä tikşergän ide. Läkin Rusiä xakimiäte häm mäxkämäse tatarlarnı saylaw xoquqınnan mäxrüm itte. Tatarstan prezidentı latinnı tıyu turındağı qanunnı milli üseşne totqarlaw diep bäyälägän ide. Bügenge Konstitutsion mäxkämä qararı tatar xalqın tağın ber qat dönya cämäğätçelege iğtibarına çığardı. Mäskäwneñ NTV kanalı jurnalistları, maxsus Qazanğa kilep, latinğa küçü-küçmäw turında ekspertlarnıñ fikerlären tuplap yördelär. Alar sişämbe könne Azatlıq radiosınıñ qazan byurosında da buldılar. Jurnalist Pavel Selinnıñ süzlärenä qarağanda, latinğa qaytunı xuplağan ekspertlar şaqtıy tabılğan, qaytuğa qarşı bulğan ekspertlarnı ğına tabu awır bulğan. Bu xaqta, sişämbe kiçendä NTV kanalında “Strana i Mir” tapşıruında maxsus reportaj bulaçaq.

Räfis Cämdixan

XS
SM
MD
LG