Britaniä, Fransiä häm Germaniä diplomatları belän tözelgän kileşü nigezendä, İran xökümäteneñ, tıyılğan atom eşçänlegen tuqtatıp toru turındağı qararın İran parlamentınıñ konservativ deputatları kisken täñqitläp çıqtı. Frans Press mäğlümat agentlığı xäbär itüençä, deputatlar, İran, säwdä, iminlek häm texnologiälär alu öçen artıq yuğarı bäyä tüli, dip beldergän. Ber deputat, älege kileşü milli mänfäğätlärgä qarşı kilä, disä, başqa berse, bu adımnı – däwlätkä xiyänät itü, dip atağan. Parlament başlığı, uran bayıtu programması tulısınça tügel, ä waqıtlıça ğına tuqtatılıp tora, dip deputatlarnı tınıçlandırırğa tırışqan. Kiläse atnada Xalıqara Atom Energiäse Agentlığı İrannıñ atom programması mäs'äläsendä cıyıla.
