Accessibility links

якшәмбе, 11 декабрь 2016, Казан вакыты 11:02

Mintimer Şäymiev: Latinğa qaytu buyınça eş tämamlanmıy


Sişämbe könne respublikanıñ Ministrlar kabinetında xökümät wäkilläreneñ küptän tügel genä Könyaq Koreyağa bulğan vizitınıñ yomğaqları xaqında söyläştelär. Premyer-ministrı yärdämçese Timur Şähiwäliev süzlärenä qarağanda, kiläçäktä Koreya wäkilläre belän bergälektä Tübän Kamadağı neft’ eşkärtü şirkäte genä tügel, ä sänäğät ölkäsendä tağın berniçä yaña proyekt tikşerelä ikän. Alar Tatarstanğa berniçä distä million dollar külämendä investitsiälär kiterergä tieş. Respublika Däwlät Şurasında Tatarstan xalıq deputatlarınıñ yärdämçeläre seminarı başlanıp kitte. Alar üzläreneñ eşlären kamilläşterü yulları xaqında kiñäşläşälär. Ä Tatarstannıñ iqtisat häm sänäğät ministrı Aleksey Paxomov häm ber törkem eşmäkärlär Mäskäwdä uzğan sänäğätçelär häm eşmäkärlär berlegeneñ XIV cıyılışında qatnaştı.

17 noyäber – Xalıqara studentlar berdämlege köne. Şuşı uñaydan respublika studentların Tatarstannıñ Sport häm yäşlär eşläre ministrı Marat Bariev qotladı. Bäyräm iäläre üzläre isä älege data uñayınnan ällä ni zur çaralar ütkärmäde. Anıñ qarawı, başqalanıñ Qazan däwlät universitetında uquçılar 17 noyäber könne dä bäyräm itülären däwam itte. Belgänegezçä, älege uqu yortı bu könnärdä üzeneñ 200 yıllıq yubileyın bilgeläp ütä. Çärşämbe könne anda töp bäyräm çaraları uzdı. Bu xaqta programmabıznıñ däwamında sez bezneñ xäbärçelärneñ yazmalarınnan äle işetersez. Xäzer isä respublikada iğtibar üzägendä torğan tağın ber tema xaqında. İnde menä ikençe kön Qazanda Rusiä Konstitutsion mäxkämäse qararı xaqında fiker alışalar. İşetkänsezder, mäxkämäneñ qararında respublikalarnıñ däwlät telläre yazılışı barı tik kiril xäreflärendä genä bula ala, dip äytelä. Xäyer, älege tema respublikada ğına tügel, ä böten Rusiädä zur qızıqsınu uyattı. Konstitutsion mäxkämäneñ qararı xaqında bar mäğlümät çaraları da xäbär itte, törle belgeçlär, ğadi keşelärneñ fikerlären citkerde. İnternettağı basmalar da bitaraf qalmadı. Tatar teleneñ latin imlasına qaytu tarixı belän tanıştıru, mäxkämä wäkilläre, Färit Möxämmätşinnıñ fikerläre belän tanıştıru belän berrättän, alarda başqa waqıtta sizelmägän tatar xalqına qarata qayğırtuçanlıq ta küp buldı. Añlatma birüçelär tatarlarnıñ kirilda näşer itelgän bay ädäbi mirasın yuğaltuı, respublikadan çittä yäşäwçe millättäşlärebezneñ tuğan teldän mäxrüm itelüe turında bik xislänep söylädelär. Şulay uq, Tatarstannı separatizmda, Rusiäne tarqawda, yuqqa millionlağan sum aqça sarıf itärgä teläwdä ğäyeplädelär. Xäyer, siräk kenä bulsa da, Konstitutsion mäxkämäneñ millätara mönäsäbätlärne bozarğa mömkin qarar qabul itüe xaqında äytüçelär dä buldı.

Respublikağa kilsäk, Tatarstan citäkçeläre dä bu qararğa üz mönäsäbätlären belderdelär. Bezneñ sişämbe programmabızda sez Färit Möxämmätşin häm Räzil Wäliev fikerlären işettegez. 17 noyäberdä respublika prezidentı Mintimer Şäymiev tä Rusiä Konstitutsion mäxkämäseneñ qararı turında uyları belän urtaqlaştı. Mintimer Şäymiev süzlärenä qarağanda, respublikada da, Konstitutsion mäxkämä wäkilläre kebek ük, Tatarstannan çittä yäşägän tatarlar niçek latin imlasına küçär digän şiklänülär bar. Şuña da, latinnı qaytaru xaqında tağın ber tapqır yaxşılap uylarğa kiräk. Läkin älege yünäleştä eş, eksperimentlar däwam itäçäk, dide Mintimer Şäymiev.

Respublikada näşer itelä torğan tatar telendäge mäğlümät çaraları isä älege mäs’älägä ällä ni ähämiät birmiçä, barı tik mäxkämä qararı xaqında räsmi belderülärne genä urnaştıru belän çiklände.

Gölnaz İlgizär

XS
SM
MD
LG