Accessibility links

чәршәмбе, 7 декабрь 2016, Казан вакыты 13:34

Universitetnıñ 200yıllıq yubiley çaraları iñ yuğarı noqtağa citte


Qazan däwlät universitetınıñ diplomın alıp, şuşı uqu yortınnan çıqqan meñlägän keşe, 200 yıllıq yubiley çaraların küzätep bara. 17 noyäberdä bäyrämneñ iñ yuğarı noqtası buldı. Qazan däwlät universitetınıñ yubiley çarasına bağışlanğan tantanalı utırış, UNİKS binasında ütte. Anda Rusiäneñ yıraq töbäklärennän cıyılğan elekke studentlar, uqıtuçılar cıyıldı. Säxnädä Prezidium äğzäläre utırdı. Alar arasında, Tatarstan Prezidentı, xökümät räise, parlament başlığı, Rusiäneñ mäğäruf häm fän ministrı, Mäskäw universitetı rektorı häm başqa däräcäle qunaqlar bar ide. Rusiä ministrı Andrey Fursenkoğa, xätta, cıyılışnı başlap cibärer öçen, utırışığız inde, dip zalğa möräcäğät itärgä turı kilde. Çönki, yıllar buyı küreşmägän elekke kurstaşlar, xezmättäşlär aralaşıp tuya almadı.

Cıyılışnı Rusiä ministrı alıp bardı, berençe bulıp Tatarstan prezidentı çığış yasadı. Ul başta, Rusiä Prezidentı Vladimir Putinıñ dotlaw xatın uqıp birde. Annan üz isemennän dä qotladı, notıq uqıdı. Üzen çığışında, Prezident, universitet üseşenä tatar ğalimnäreneñ kertkän öleşen häm şuşı yuğarı uqu yortınıñ tatar tarixın, mädäniäten öyränügä quyğan tırışlığın dä bilgeläp kitte. Mintimer Şäymievtan soñ, Universitet rektorı Mäqzüm Säläxov çığış yasadı. Ul universitet tarixına tuqtalıp, yazuçılar Aksakov, Lev Tostoy belän ber rättän Qayum Nasri, Ğilem Qomay kebek ğalimne iskä aldı. Ul şulay uq, universitet yubileyı öçen aqçalarnı respublika byudjetınnan alınğanın äytep kitte. Universitetnıñ 200 yıllığı belän elekke student, aspirant, uqıtuçı, ä xäzer Duma deputatı Oleg Morozov ta qotlap çığış yasadı. UNESKOnıñ Mäskäw bülege wäkile, UNESCO başlığı Koichiro Matsuuranıñ qotlawın uqıp birde. Universitet bäyrämenä, Almaniä, AQŞ, Angliä, xätta Qıtay uqu yortları wäkilläre kilde. Tantanalı utırışta Rusiä universitetları rektorları da qatnaştı. Qazanda yuğarı belem alğan, ä xäzer Kastroma gubernatorı bulğan Viktor Şerşunov çığış yasadı. Berençe rektorlarnıñ berse Loboçevskiynıñ tuğannarı, akademik Zavoyskiynıñ ulı da qatnaştı anda. Qunaqlar arasında Fikrät Tabeev ta bar ide. Ul 50nçı yıllarda universitetnı tämamlağan keşe. Şağir Yevğeniy Yevtuşenko da universitet yubileyına kilde. Ul tantanalı cıyılışta bulmadı, Qazannı ayırım qarap yörgännän soñ, jurnalistlar belän oçraştı, bäyräm konsertın qaradı. Yubiley çaraları yağın 2 kön däwam itäçäk.

Bikä Timerova.

XS
SM
MD
LG