Accessibility links

якшәмбе, 11 декабрь 2016, Казан вакыты 07:22

Ğiraqta totıq itep alınğan xalıqara yärdäm xezmätkäre Margaret Xäsän üterelgän dip xäbär itelä


Çärşämbedä kilgän xäbärlärgä qarağanda, Ğiraqta totıq itep alınğan humanitar oyışma xezmätkäre, Britan häm Ğiraq watandağı bulğan Margaret Xäsäneñ isän buluına ömetlär qalmadı diärlek. Bu ayanıç xäbärne Britan räsmiläre dä raslıy. Xäbär döres bulıp çıqsa, Margaret Xäsän Ğiraqta üterelgän berençe totıq xanım bulaçaq.

Sişämbedä ğäräp telendä tapşıruçı Äl-Cäzirä televideniese berniçä kön elek küzläre bäylängän ber xanımnıñ atıp üterelüe turında videotasma aluı turında xäbär itte. Äl-Cäzirä bu tasmanı efirğa birmäde, ämmä bu üterelgän xanım Margaret Xäsän bulırğa tieş digän xäbärlär bar.

Çığışı belän İrlandiädän bulğan 59 yäşlek Margaret xanım 30 yıl elek Ğiraq keşesenä kiäwgä çığıp Ğiraqta yäşägän. Anıñ Britan häm Ğiraq watandaşlığı bar. Ğömereneñ zur öleşen Ğiraq xalqına yärdäm itügä bağışlağan Margaret xanım soñğı 12 yılda CARE isemle humanitar oyışma xezmätkäre bulğan.

19 Üktäber eşkä barğanda bilgesez keşelär anı totıq itep alğan häm Britan xärbiläre Ğiraqtan kitmäsä üterü belän yanağan. Totıq aluçılar töşergän videotasmalarda Margaret xanım Britan räsmilärenä möräcäğät itep, ğäskärlärne Ğiraqtan çığarırğa, törmädä utırğan Ğiraq xatın-qızların irekkä çığarırğa çaqırğan.

Margaret xanımnıñ üterelüe turında xäbär kilgäç, anıñ qayğığa batqan ire Tahsin Xäsän, urlawçılarğa möräcäğät itep, xatınınıñ hiçyuğı cäsadın qaytarırğa ütende:

Audio (Tahsin Xäsän)

"Ul miña kiräk, min anıñ belän xuşlaşırğa telim. Margaret minem belän 30 yıl yäşäde. Bar ğömeren Ğiraq xalqına xezmät itügä bağışladı. Zinhar anı miña qaytarığız."

Margaret xanımnıñ üterelüe öçen cawaplılıqnı älegä berkem dä üz östenä almadı. Bu waxşilek xättä ğisyançılar ğämäle qısasına da sıymıy. Britan watandaşı bulsa da, ul inde 30 yıl Ğiraqta yäşägän. Amerikan xärbiläre, yä şirkätläre belän xezmättäşlek itmägän. Margaret xanım kebek humanitar oyışma xezmätkärlären ğisyançılarnıñ elegräk irekkä cibärgäne bar ide.

Margaret xanımnıñ CARE oyışması bu qayğılı xäbärgä tetränüen belderde. Britan premier-ministrı Tony Blair çärşämbedä Parlamentta çığış yasap:

Audio (Tony Blair)

"Min beläm, bar Parlament bu xäl uñayınnan qayğı urtaqlaşırğa, 30 yıl ğömeren Ğiraq xalqına bağışlağan Margaret Xäsängä ixtiram belderergä teli."

İrlandiä citäkçese Bertie Ahern da Margaret Xäsän ğailäseneñ tirän qayğısın urtaqlaştı.

CARE oyışması eşen finanslağan Yevropa Berlegeneñ humanitar yärdäm komissarı Poul Nielsen bu xäl uñayınnan qayğı urtaqlaşıp, mondıy waxşileklär Ğiraq xalqına yärdäm itü eşen qurqınıç astına quya dip belderde:

Audio (Jonathan Todd, Yevropa komissiäse süzçese)

"Mondıy yırtqıçlıqtan soñ Ğiraqta möxim eş başqarğan oyışmalar eşlären tuqtatu däräcäsendä. Monıñ qorbannarı yärdämsez qalğan moxtac ğiraqlılar bulaçaq."

Bagdad uramında Xäydär isemle yeget bolay dide:

Audio (Xäydär)

"Bu xanım Ğiraq xalqına xezmät itkän. Ägär anı çınlap ta ütergän bulsalar, bu waxşilek. Xatın-qıznı üterü, xättä doşman bulasa da, ğäräp ählağına turı kilmi."

Şuşı yılda ğına Ğiraqta 170tän artıq çit il keşese totıq itep alındı. Margaret Xäsän turında qayğılı xäbär raslansa, ul Ğiraqta üterelgän berençe totıq xanım bulaçaq.

-Ali Gilmi
XS
SM
MD
LG