Accessibility links

сишәмбе, 6 декабрь 2016, Казан вакыты 17:10

Alapay tatarları belän oçraşu


“Milli televidenie tapşıruların Ural tatarlarına citkerü” programmasın tormışqa aşıru bıyıl Yekaterinburg şähärendä eşläp kilüçe Milli Media-Xolding alıp barğan eşlärneñ töp yünäleşläreneñ berse buldı. Bötendönya tatar kongressı başqarma komitetı belän berlektä Sverdlov ölkäse buylap bu yıl barlığı tatarlar küpläp yäşägän 42 töbäktä sputnik teleantenna belän televizor komplektları quyıldı. Soñğı un komplekt küptän tügel ölkäneñ könçığış häm tönyak rayonnarındağı şähär häm poseloklarda urnaştırıldı.

Bu könnärdä Milli Media-Xolding Qazannan kilgän zur delegatsiä belän berlektä bu şähärlärdä xalıq belän oçraşular oyıştırıp, “Yaña ğasır” televideniese tapşıruların täqdir itü kiçäläre uzdırdı. Bötendönya tatar kongressı başqarma komitetı räise urınbasarı İlsur Hadiullin citäkçelegendä Ural tatarları belän oçraşuğa Tatarstannıñ xalıq artistı Mirsäyet Sönğatullin, kompozitor häm cırçı Wäis Bäyrämov, yäş cırçı Albina Kinjalieva häm TNV telekanalınnan icat törkeme kilgän ide. Älege oçraşularğa ğomumi küzätü yasap qına ul waqiğalarnı surätläp beterü mömkin tügel. Qayber şähärlärgä ayırım tuqtalıp ütäse kilä. Mäsälän, ölkädä iñ “revolyutsion” bulıp sanalğan Alapay şähäre.

Borınğı urıs qalası bulıp isäplänsä dä, biredä tatarlar küp yäşi. Ölkä üzägennän yıraq qına urnaşqan bulsa da, bu şähärdä tatar milli tormışı bik qızıqlı häm canlı bara. Milli üzäk citäkçese Naciä xanım Safiullina äytüençä, 1991 yıldan birle tatar yäkşämbe mäktäbe eşläp kilä, bu mäktäpkä xätta rus balaları da bik qızıqsınıp yöri. Rus balaları tatar cır häm bиyu tügärägendä bik teläp qatnaşalar. “Çulpan” dip atalğan balalar ansamblenä ütkän yıl 5 yäşe tulğaç kilgän rus qızı Ksyuşa Ryavkina bik matur itep, cirenä citkerep tatar xalıq cırların başqarırğa öyrängän.

Naciä apaları balalarnı cır-biyugä öyrätüdän tış, “Umırzaya” isemle olılar ansamble dä oyıştırğan. Anıñ xezmätlären cirle xakimiät wäkilläre dä bik yuğarı bäyäli. Şähärneñ mädäniät idäräse citäkçese Anatoliy Kuznetsov oçraşu waqıtında tatar ansamble eşläre belän bik ğorurlanıp söyläde. Cirle xakimiät inde küptän tatar milli üzägenä häryaqlap yärdäm kürsätä ikän. Bu aralarda alar ikençe ber bik zur eş başlarğa cıyınalar – “Yaqtaş” isemle tatar gazetası çığara başlarğa äzerlänälär. Gazeta çığımnarın xakimiät tulısınça üz östenä alırğa äzer.

Tatar milli üzägenä şähär mädäniät yortı binasında ayırım ber bülmä bilgelängän. “Yaña ğasır” tapşıruların kürsätügä yaraqlaştırılğan komplekt ta şuşı bülmägä urnaştırılğan. Bu turıda üzäk citäkçese Naciä xanım bolay dip söyli. - “Şuşı keçkenä genä bülmäbezdä zur tormış belän qaynıybız, - di ul, - Xäzer televizor da bulğaç, qaytıp kitäse dä kilmi. Bezneñ xalıqta äytälär bit, qızlarnı kiäwgä birgändä, art yağı nıqlı bulsın dilär. Şunıñ şikelle, bezneñ art yağıbız nıq, yärdäm itep, bulışıp toruçıbız quätle. Tatarstan yağınnan mondıy yärdäm biredä bezneñ avtoritetnı şulqädär kütärde, xätta könläşep quyuçılar da buldı. Ul ğına da tügel, şähär xakimiäte başlığı sputnik televidenie tapşıruların här yortqa kertü turında wäğdä birde”. Kabel' televideniese yärdämendä Tatarstan tapşıruların här yortqa citkerü öçen xakimiät citäkçeläre inde eş alıp bara başlağannar. Bu quanıçlı waqiğanı Alapay tatarları bik zarığıp kötälär.

TNV tapşıruların täqdir itü kiçäsenä dä xalıq bik küp bulıp cıyıldı. Tatarstannıñ xalıq artistı Mirsäyet Sönğatullin, inde xalıq küptän yaratırğa ölgergän küp kenä cırlar avtorı kompozitor häm cırçı Wäis Bäyrämov, sanduğaçtay tawışı belän äsir itkän yäş cırçı Al'bina Kinjalieva qatnaşuında uzdırılğan zur konsert xalıq öçen kötelmägän zur büläk buldı. Çın sänğät ostaları çığışın xalıq küz yäşläre aşa söenep qabul itte. Annan soñ qunaqlarnı räxmätlär uqi-uqi, izge yul teläp ozatıp qaldılar.

Fäwiä Safiullina, Yekaterinburg

XS
SM
MD
LG